ده یرلی شاعیر و ادبیاتچی فریدون حاصارلی

نوشته شده توسط یئکن لی ارکین

پنـبه ی  داغ  جنـون  ایـچره  نهـان  دیر  بدنیم       

 دیـری اولدوقجا لباسیم بودور ،اؤلسم کفنیم

جانی جانان دیله میش وئرمه مک اولماز ای دیل    

نه نزاع ائیله یه لیم اول نه سنین دیر نه منیم

  درین دوشونجه لی ، یوکسک سجییه لی، و وقارلی داغین گؤی لره یوکسه لمه سی، مطلق سوکوتا قوناق گئتمه سی، دوز - چوره یینه آند ایچمه لی بیر یولداشین نورلار ایچینده یاتماسی، کؤنوللریمیزی، آیریلماغی ایله، آجی – آغی ائدن اینسانین ایتگیسی، اوره ک سارسیدیجی دیر.

آذربایجانین هر بیر ضیالی سی عؤمرون دئییشنده، وطنیمیز آذربایجان آغیر گونلر کئچیریر.آنجاق وطن ساغ اولسون دئیه، وطنیمیزه داها آرتیق باش اوجالیق و اونون شرفلی اوغول – قیزلارینا اوزون عؤمور، جان ساغلیغی، یئنی باشاریلار و اوجا ذیروه لرده اولماق دیله ییریک.

آذربایجانین یکانات ماحالیندان اولان رحمتلیک فریدون حاصارلی اؤز ذکاسی ایله ادبیات ساحه سینده چالیشانلاری گئرچکدن حئیران ائتمیشدیر. اونون آنا دیلینه بسله دیگی سونسوز محبت توکنمز ایدی، اونا گؤره قوشدوغو شعرلرین چوخ حیصّه سی آنا دیلینه عاییددیر.

اوستاد حاصارلی نین ، اؤز حایات یاشامیندا، یاراتدیغی اثرلر آنادیللی نشریه لر ده دفعه لرجه چاپ اولسادا ،یقین کی چوخلو اثرلری هله ایشیق اوزو گؤرمه ریب ، حتما کی اوستادین شرفلی اوغلو رضااورمان جنابلاری اونون اثرلرینی بیر یئره توپلاییب چاپ اوچون حاضیرلایاجاقلار. بو یازینین سونوندا رحمتلیک فریدون حاصارلی نین، "آذربایجانلی اوشاق بیرینجی کلاس دا" آدلی شعرینی بیر داها خاطیرلاییریق: 

بیرینجی   درسیمیز باشلانیربئله

لوله دن  سو  آخیب  دؤنوب دور  سئله

سوروشدو  معللیم   او  نه دیر  دئنه ن

دئدیم کی  او  سو دور   جوابین دا  من

آجیقلی  بیر حال دا    قیشقیردی   منه

یوز  دفعه    دئمیشم   بونا  «آب»   دئنه

ایگده چیرپیسی نان چالدی  باشیمدان

عاغلیمی    هوشومی  آلدی    باشیمدان

اوقه دیر چکمه دی  حالیم  دوزه لدی

یئنه معللیمین    گؤزو  بره لدی

سوروشدی یئنیدن اؤیره ندین یا یـوخ

سؤیله دیم اوسودور هئچ ده شککیم یوخ

بو دفعه  الیمه  دؤرد  چیرپی  چالدی

گؤزومون   اؤنون ده دونیا قارالدی

دئدی صاباح اگر  اؤیره نمه سن، سن

دده وی  یاندیررام   اوندابیله رسن

بونون آدی«آب»دی«آب»دی«آب»دی آب

بیلمه سن   جیگرین   ائیله ره م    کباب

یولو  اؤز -  اؤزومه    فیکره  دالیردیم

اونون  سو اولدوغون  یاخشی  قانیردیم

بس  نی یه   معللیم    دؤیوردو   منی؟

دوغرو  بیر  سؤزومه   سؤیوردو  منی؟

صاباح دان  سوروشدو  سویون  آدینی

قورخودان «آب» دئدیم   اونون   آدینی

*  *  *

ایکینجی  درسیمیز  چؤره کدن   دئییر

شکیل ده    اوشاقلار    ناشتالیق   یئییر

معللیم  گوله ره ک  سوروشدو  مندن

یاخشی اؤیره ن میسن «آب»ی دونندن

دئه گؤروم اوشاقلار نه ایش گؤرورلر

تئز دئدیم  کی  اونلار  چؤره ک یئییرلر

دئدی یوخ- یوخ بونو بیله سن گره ک

«نان» دیر بونون  آدی  دئیه سن گره ک

دئدیم  بونه سؤزدور دئییرسینیز ، سیز

مگر   چؤره گی ده   تانیمیریق    بیز ؟

چیغیردی کس سسین ای فضول باشی

تؤکه ره م  ایندیجه  گؤزون دن   یاشی

قبول  ائیله مه دی   دوغرو   سؤزومو

دولادی  چیرپی یا  او  باش- گؤزومو

اود توتوب  یانیرام  بیلمه م   بو ایشی

نه چون  زورلا  یالان  دئییر  بو کیشی

دردیمی   سؤیلویوم    کیمه   ایلاهی

دوغرو  دانیشماغین  وارمی   گوناهی؟