آنا دیلیم اولن دئیل - باشقا دیله چونن دئیل

مدرسه ده موعللیم
یئنه دؤیدو الیمدن
باجارمادیم فارسینی
ایراد توتدو دیلیمدن

دئدیم : آغا موعللیم
وورما ، گؤینه دی الیم
نه دیر آخی گوناهیم
تورکودور منیم دیلیم

یاپیشدی قولاغیمدان
دئدی : بوراخ تورکونو
او قالدی ائوینیزده
اونوت گئتسین کؤکونو

اؤیره نمه سن آب – بابا
آچاجاقسان الینی
کؤتک یئیه ندن سونرا
اونودارسان دیلینی

سنین هاران تورکدور؟
آذریسن ، آذری
کیم اؤیره دیبدیر سنه
بئله یانلیش سؤزلری

آخدی گؤزومون یاشی
تیتره دی دیل – دوداغیم
بئله یالان سؤزلره
اینانمادی قولاغیم

آنام منی اویدورماز
آتام منی آللاتماز
بو سؤزلرین هئچ بیری
منیم عاغلیما باتماز

نییه منیم آدیمی
سوروشماییر اؤزومدن
نییه سؤزون دوزونو
اوخوماییر گؤزومدن

هرکس یالان دانیشسا
آللاهین دوشمانیدیر
من کی یالان دئمیرم
بو اونون یالانیدیر

لایلای دئییبدیر آنام
منه بئشیکده تورکو
دانیشمیشیق هامیمیز
ائوده – ائشیکده تورکو

نه دن گرک یازمایاق
دیلیمیزی کیتابا ؟
مدرسه ده نه اوچون
گلمه یک بیز حئسابا؟

هئچ عاغلیما سیغماییر
نه دیر بونون جاوابی
سو یئرینه اوخویام
مدرسه میزده آبی

یقین کؤتک یئمزدیم
اوخوسایدیم دیلیمی
گؤینه رتیدن سیخمازدیم
قولتوغوما الیمی

قوی بؤیویوم بیر اؤزوم
اولاجاغام موعللیم
اوندا چوخ ایش گؤره جک
بو گون گؤینه ین الیم

کیلاسیمدان گله جک
ائلیمیزین اؤز سسی
اولاجاقدیر او زامان
تورکون ده مدرسه سی

آذربایجان منیم ائلیم

 دوغراسالار دیلیم دیلیم باشکا دیله دونن دییر

دیلیم  اولسه من اولم

 آنا دیلیم اولن دیر. باشکا دیله دونن دییر