وو وی۱ / رقیه کبیری

جان… جیسم… ایکیسینه‌ده توخونوب، ایکیسینی ده زده‌له‌ییب. هاردان کؤک سالمیشدی؟ بیلمیرم. هاردان کؤک سالدیغینی نه علمین باشی چیخیر، نه ده منیم. دوردوغوم یئرده کؤک آتمیشدی. نه ال توخونموشدو، نه آغیز. نه بیر کؤرپه‌نی دیرچلتمیشدی، نه ده بیر سئوگی‌یه جان وئرمیشدی. جانیمی زده‌‌له‌ییب، جینسیّتیمه قییدی.
یارا وار باغلارلار، یارا وار داغلارلار. آمما منیم باغلانمیش یارامین داغ- دامغاسی هم جانیمین، هم ده جیسمیمین جینسیّتنه توخوندو.
آینالانیرام. جیسمیمی آینانین دوُرولوغوندا گؤرورم. الیمی سینه‌مه چکیرم. هله ده آغرییر. قیراغا چکیلیرم… آینالانیرام… قیراغا چکیلیرم… آینالانیرام… آینا منی اؤزونده ساخلامیر. تاپدیغی کیمی ده ایتیریر. کئف‌سیزلیک‌له آینا توتماز. کئف‌سیزلیک آینانین دوُرولوغونو کاسلادیر. جیسمیم‌له جانیما باسیلمیش دامغانین ایزی کیمی. سرطان، جیسم- جانیمی زده‌‌لمه‌دن ایلیشیب آینادا قالمالی‌یدیم. اولاسی‌یدی؟ گؤره‌سن بیر گون بیر آینا تاپیلاجاق کی اینسانین ساغلاملیغینی اؤزونده ساخلاسین؟!
دئسم کی شیمی‌درمانی سببیندن توکو تؤ‌کولموش باشیم هئچ ده وئجیمه دئییل، یالان دئمیشم. گئج- تئز، توکوم کؤکدن گؤیه‌ره‌جک. آمما دؤشوم نئجه..؟
«آغلاماقدان ایش چیخماز»، دئدی. «اؤزووو بوراخاجاخسان. اؤزووونن ساواشمییه‌جاخسان. سنی استرس‌دن قوتارار. آرام اوتوراجاخسان تا اؤزو آستا- آستا گلیب گئچسن»
– «ایش ایشدن کئچندن سورا؟»
– «هله نه اولوب کی؟ اوُزون اوُزادی بیر یول وار قاباغیندا»
اوتاندیم دؤکتوره دئیَم کی، منیم احوالیم تویدان سوراکی حنا احوالیدی. «کوردان، کاردان، چولاخدان اولسایدیم گئنه بیر سؤز…»، دئدیم.
– «هر اورقانین اؤز یئری وار. شوکر ائله کی ایندی هر جور پروتز وار.»
– «پروتز؟… یوخ! قوی اوندا سینه‌م تاختا کیمی قالسین، آمما پروتز یوخ!»
سؤزومو سایماییب، سؤزونه دوام وئردی:
– «هئش جور چالیشمییه‌جاخسان. نه فیکیرلشه‌جاخسان، نه ده چالیشاجاخسان کی فیکیرلشمییه‌سن. قوی فیکیرلر عیناً سیچان کیمی هاردان گلیر گلسین، هارا گئدیر گئتسین. سن فقط دور باخ. آنجاق پیشیک کیمی اولاری توتماق اوچون اوستلرینه جومما. فیکریوی‌نن عملین بیر اولسون. گئدنده گئت، گلنده گل، اوتوراندا اوتور. یئینده یئه، گؤیلون موسیقی ایسته‌ینده، موسیقی‌یه قولاخ وئر… آغلایاندا دا آغلا. آنجاق هئچ کیمی سایما. اؤزون اؤزووه دئه کی، ایندی آغلاماغیم گلیر، اونا گؤره ده آغلیرام. اؤلنده ده اؤل، آمما اؤلومه فیکیر وئرمه.»
بیزیم بو حکیم انکولوژیست۲ اولمادان چوخ، پسیکولوژیست‌۳ دیر. چالیشدیم هر زادا عادی باخیم. باشاردیقجا فیکر ائله‌مه‌ییم. اونون دئدی‌یی کیمی باغداش قوردوم. بارماقلاریمی بیر- بیرینه قیفیللادیم. کوره‌ییمی دیکلتدیم دؤشومو قاباغا وئریب، گؤزلریمی یومدوم کی، بلکه ایچیمده اولان هؤشنه آستا- آستا گلیب، سوووشسون. دؤشوم تیره چکدی. آغلاماغیم گلد‌یینه گؤره آغلادیم…
آینالانیرام. جرّاحلیقدان سورا، بو بیرینجی دفه‌دیر کی جسارت تاپیب، بو قدر آینا قاباغیندا دایانیب، اؤز جیسمیمه باخیرام. بیر آینایا باخیرام، بیر ده آینانین باشیندا چرچیوه‌لنمیش جیسمیمین بیر پارچاسینا، سرطانلی اورقانیمین شکلینه. اوزده ساغلام گؤرونور، آمما ایچدن آغاجین ایچینی قورد یئمیش کیمی‌دیر.
آینا نه قاش- گؤزومو گؤستریر نه آغیز- بورنومو، نه ده چیین‌لریمه آغیرلیق ائله‌ین قوللاریمی. آنجاق سینه‌مده‌کی بیر جوت نور‌افکن کورلوغونو اوزومه چکیر. اوسته‌لیک هامار و کیشی کؤکسونه دؤنموش دؤشوم گؤزومه هم آغلامالی، هم ده گولمه‌لی گلیر. اوره‌ییمی یاندیران یئری بوراسیدیر کی، حتی کیشی‌لرین دؤشونده اولان مرجی بویوندا گیله ده، تاختایا دؤنموش صاف سینه‌مده گؤزه دیمیر. هامارلانمیش کؤکسومده، دریمین کسیلمیش یئرینده، تکجه اَت- دری جینسیندن اولان، بیر جوت مووازی قیرمیزی خط گؤرونور آنجاق.
آیاغا دوروب اؤزومو آزاد بوراخیرام. چالیشیرام طبیعی باخیم هر شئیه. چالیشیرام یوخ، سهو ائله‌دیم. اصلینده چالیشمیرام. استرس، غصه، فلان قوی اؤزو گلیب کئچسین. نه ایشیم وار آخی..! بو گونلر ایشیم- پئشه‌م اؤزومله باریشماق اولوب. چالیشیرام اؤزومله نه ساواشیم، نه ده ساواشماییم. ایستیرم باشاردیقجا طبیعی داورانیم. تاپینماق کیمی. آغلاماغیم دا آغلاماغا تاپینماق‌دیر. ندنینی آختارمادان آغلاییرام. آغلاماغی نه پیس، نه ده یاخچی سانیرام. «ساده‌جه آغلایاندا آغلا، گولنده گول»، اؤزوم اؤزومه دئییرم.
مریضخانادا قالارکن قالمیشدیم کی موبایل‌لا اؤزومدن چکدی‌ییم شکیلی وئریم ظاهیر ائله‌سینلر یا یوخ. طبیعی داورانماق فیکریمی بیر یانلیق ائلیر. ایسته‌دی‌ییم ایشی گؤرمه‌لی‌یم، نه اولور اولسون.
شکیل‌خانایا گیرنده، استرس، غصّه، هامیسی اؤتوب، بیتمیشدی. اؤزومو یاخشی اله آلمیشدیم. ایچری گیرمه‌دن شکیل‌خانانین آینا شوشه‌سینده باشدان آشاغا، اؤزومه بیر نظر سالدیم. تاختا کؤکسوم شوشه‌نین آینالیغیندا ائله ده بتر گؤزه ویرمیردی.
«بو شکیلی ظاهیر ائله‌ییب، سورا دا چرچیوه‌یه توتارسیز» دئییب، موبایلیمی شکیلچی‌یه ساری اوُزاتدیم. شکیلچی قبیضی میزین چکمه‌سیندن چیخاردیب، اوزرینده بیر شئی یازمادان، موبایلی اَلیمدن آلیب باخدی. قفیلدن ایلدیریم وورموش آدام کیمی بیردن- بیره رنگ روفو دَییشدی. یئریندن قالخیب:
– «بو نه‌دی خانیم؟ اؤزووو سَریمیسن؟»
–  «نه‌دی کی، شکیل‌دی دااا»
شکیلچی‌سه قاشلارین دؤیونله‌ییب، سیقار قوطوسونو کؤینک جئبیندن چیخاردیب، بیر سیقار آلیشدیردی:
– «من بو ایشلردن گؤرمه‌رم… اماکن گلیب بونو منیم لابراتوواریمدا گؤرسه، توکان- بازاریمی چکیب باغلار»
موبایلیمی آلیب، سویو سوزولموش شکیل‌خانانین قاپیسینا ساری یوللانیردیم کی، آیاغیمی ائشییه قویوب- قویمامیش بیر داها گئری دؤندوم. شکیلچی دؤندویومو گؤرجک، عصبی بیر حالدا سیقاری‌نین کؤتویونو فیلیم قوطولاری‌نین بیریسی اوزرینده ازمک ایسته‌دیکده بارماقلاری قوطونون داریسقال آغزینا ایلیشدی. گوجونن بارماقلارینی قوطونون ایچیندن چیخاردیب گؤزاوجو منه باخدی. منسه دوداغیمی قاچیرتدیم.
«آی محترم، بو سرطانلی بیر خانیمین عملدن قاباخ عکسی‌دی. ایندی جراحلیخ ائلییبلر. ایستیر بدنی‌نین کسیلمیش قیسمتینی عؤمرو بویو اوتاغی‌نین دووارینا ووروب، یادیگار ساخلاسین. آللاه ائلمه‌میش زننده عکسی زادی دَییر کی! بیرده بون‌نان سیزین توکان بازاریزین باغلانماسینا نه دخلی وار؟»
شکیلچی قالدی کی گولسون یوخسا کدرلنسین. بیر اؤزومه، بیر ده هامارلانمیش کؤکسومو سوزدو.
– «آلـلاه کؤمه‌یی اولسون»
منسه اؤزومو سیندیرمادیم:
– «ایندی آمازونلارا بنز‌یر»
شوبهه‌لی بیر حالدا دلی‌یه باخان کیمی منه باخدی:
– «آمازون ندی؟»
– «آمازونلار یونان افسانه‌لرینده دؤیوشن خانیملاریدیلار کی، یایی دؤشلری اوسته راحاتجا چکیب، کیشی دوشمن‌لری اوخلاماغ اوچون اؤزلری بیله- بیله دؤشلرینی کسرمیشلر»
شکیلچی قفیلدن قهقهه چکیب گولدو.
– «مئمورینی چیخارت وئر گؤروم نئینیه بیللم… ظاهیر ائلییَن‌نن سورا فایلین سیله‌جام. سن ده شتر دیدی، ندیدی هاااا… یاخچی؟ هئش کیم بیلمه‌سین من بو شکیلی ظاهیر ائله‌میشم هاااا»
– «سیز بونو منه بیر تابلو کیمی وئرین من ده عاغلیمین لغت‌خاناسیندا هر نه شتر وارسا سیله‌رم»
آینانی اؤزومدن بوشالدیرام. منسیز اونون دورولوغو داها دا گؤرکملی‌دیر. کامپیوترین باشیندا اوتورمامیش بیر داها چیلپاق جانیم‌لا دیزه چؤکورم. خودخوری ائلمه‌دن بیر آز دؤزورم. استرس‌سه اؤزباشینا گلیب اؤتوشور. پروتزلری سئچمه‌یه گرک سویوق‌قانلی اولوم. حتی بو دؤنه اؤکوتمه‌یله آغلاماق ایسته‌ییرم، اؤکوتمه‌یله آغلاییب، دینجه‌لیرم. غصه‌دن بوشالیرام. ایندی عاغیللی- باشلی آدام کیمی کامپیوتر باشیندا اوتورا بیله‌رم.
مانیتورداکی پروتزلرین شکیل‌لرینه باخیرام. بو پروتزلرین هئچ بیریسی آینانین باشینا ووردوغوم تابلویا بنزه‌میر.
دؤکتور «هر ایکیسینده ده وار… اؤزو ده قرئیدِ سه دی»، دئمیشدی. دانیشا- دانیشا  پاتولوژی‌نین آنالیز کاغیذی الینده بوزوشموشدو. دؤکتوردن اؤنجه اؤزوم گوگل‌ین آختاریش موتوروندا «قرئیدِ سه» آنلامینی آختاریب، تاپمیشدیم. سورا تک‌باشینا اوتوروب آغلامیشدیم. اوندا هله طبییعی داورانماغی، اؤزومله ساواشماماغی باشارمیردیم. آغلاماغا گؤره دئییل، اؤز حالیما اوره‌ییم یانیب، آغلامیشدیم. منی اؤیودن اولمامیشدی. غصه خیرتده‌ییمین یولون کسمیشدی. اؤزوم اؤزومه توختاقلیق وئره بیلمیردیم.  اوره‌ییم ایسته‌میشدی کاشکی بیریسی تاپیلیب، منی دانلاییب، دئیردی: «اؤزووو سَریمه قیز، دور آیاغا! درمان دالیسیجا گئتماخ عوضینه اوتانمیسان اوتوروب گؤزووون آبقوراسینی سیخیسان؟ اؤلوم دئییل کی قیر- ساققیز کیمی گلیب سنه یاپیشسین. سرطاندی دااا. ماشالــلاه  اؤزون کی درس اوخویوبسان بیلیسَن کی علم هر دَیقه، هر ثانیه آپدیت اولور!»
دی گل کی، کیمسه تاپیلمامیشدی بو سؤزلری منه دئسین. علم هر ثانیه آپدیت اولسایدی دا، هله بوراجان اونون ندنینی، هاردان گلدی‌یینی، نئجه تاپیلدیغینی بللی ائده‌ بیلمه‌میشدی.
خرچنگ سؤزونو اؤزوم اؤزومه تکرار ائله‌ینده قفیلدن خرچنگ‌لرین ماققاشا اوخشار قوللاری، کؤکسومو جیرماقلاییب، دؤشلریمی دیده‌له‌دی‌یینی حیس ائله‌میشدیم. سورا اؤز- اؤزومه «یووو، نه خرچنگ نه ده کانسر، ائله من ده هامی کیمی سرطان دئیه‌جه‌یم. سرطان سؤزو خرچنگدن داها یومشاق دیلیمده دولاشیر. سرطان یومشاق- یومشاق اینسانلارین جانینین کؤکونه ایشله‌سه ‌ده، خرچنگ سؤزو کیمی، قاباجیل دئییل، آغیزدا دولاناندا، آدامین جانینی دیده‌له‌میر. آنجاق نسه اؤلوم کیمی بیر جور قورخو سالیر آدامین اوره‌یینه»
بون‌نان بئله دؤکتوردن سوروشدوم: «قرئیدِ سه یانی نمنه؟» او ایسه ماتملی باخیشینی منه زیلله‌دی. باخیشی ائله غصّه‌لی‌یدی کی بیر آن اؤز دردیمی ایتیریب، اونون دردینه قالدیم. دئدیم یقین دؤکتورون ده لاپ یاخین آداملاریندان بیریسی، بلکه باجیسی، بلکه ده یاشام یولداشی بو درده گرفتار اولوب کی، اؤزونو منیمله بئله اؤزدش گؤستریر.
– قرئیدِ سه یانی اوّلین فورصتده گرَح عملِ جراحی اولاسان. جراحلیقدان سورا دا انکولوژیست یانینا گئدیب شیمی‌درمانی درمانلاری آلاسان. اؤزوده آغیر عمل‌دی. بیر آز دا باهالی‌دی. تعجّوب ائلیرم… آخی… بئله سنین یاشیوا یاراشمیر باااا!»
دؤکتور یادیمدان چیخارتدیغیم تک‌باشینا اؤتوب کئچن قیرخ ایکی ایلی یادیما سالدی. آز قالیردی دؤکتورون سؤزلرینی دینله‌یه- دینله‌یه گؤز یاشلاریم گئنه یاناقلاریمی ایسلاتسین. او ایسه میزی‌نین اوستونده‌کی کیتابی وارقلایاراق سؤزونه دوام وئردی:
– «هرچند، نئچه ایلدی کی ابتلا یاشی آشاغی گلیب، اما هر دردین بیر درمانی وار…. دئدین سوبایسان دا، یووو؟ سَن‌نَن سورا خانواده‌زده سرطانا مبتلا اولان وار؟.. واختی تلف ائله‌مه. یازیرام گونو صاباح گئدیب مریضخانادا یاتاسان»
گؤز قاباغیندا اولان وجودومون قادینلیق کیملی‌یی بیر آزدان یوخا چیخاجاق ‌ایدی. بیله‌ییمه باغلادیقلاری قول‌باغی‌نین اوستونده یازیلمیش کیملی‌ییمی اوخودوم. آدیم، سوی آدیم، آتامین آدی‌نین یئری قول‌باغینا یاپیشمیش برچسبین اوستونده بوش قالمیشدی. گؤزلریم دولوخدو. دؤشلریمی اوووجلاریمدا توتدوم. اوووجلاریما آغیرلیق ائله‌دی. لَمف دویونلری اونلارین ایچینده سرطانا دؤنوب، وَز باغلاسایدی دا، هله ده یومشاق ایدیلر. اووجومو اَل دییلمه‌میش دؤشلریمین گیله‌سینده دولاندیردیم. قولتوقلاریمین  آلتیندا گزدیردیم. بارماقلاریمین اوجو جویز بویدا لَمف‌لره توخوندوقدا، اؤزومدن اختیارسیز آغلادیم. پرستار قاپیدان اَییلیب، دئدی: «سانجاق، ساعات، مصنوعی دیش… هرنه واریندی چیخارت! یاریم ساعاتا جان عمل اوتاغینا گئده‌جاخسان… باخ… بونا! هله آغلیری… نه‌یین معطلی‌سن؟ دی دور عمل پالتارلاریوی گئی آخی!»
جانیم ائله بیل سال داش ‌ایدی. گوج- بیللاهینان اونو تخت اوستوندن قالدیردیم.
پرستار بیر داها گئری دؤنوب «تئز اول پالتاریوی دَییش آخی»، دئدی.
اونون دئمه‌یینه اؤکوتمه وورا- وورا اَینیمیده‌کی مریض‌خانا پالتارینی چیخاردیب، کاغیذ کیمی خیشیلدایان بیر دفه‌ گئییملیک پالتاری گئینده عاغلیمدان بیر فیکیر کئچیب آغلاماغیم درحال کسیلدی. پالتاری گئیمه‌میش موبایلمیی گؤتوروب، جانیمین زده‌لنمیش بؤلگه‌سیندن بیر نئچه شکیل چکدیم. بیردن- بیره پرستاری قاپی چرچیوه‌سینده دایانمیش، اوزونو جیرماقلایارکن گؤردوم…
آینانین باشینا وورموش شکیلی گؤتوروب، مانیتوردا گؤرونن پروتزلرله توتوشدورورام. بیر گؤزوم شکیلده، بیر گؤزوم مانیتوردا…
دؤکتور «قارنیندان کسیب، پروتز قویماق اولار»، دئمیشدی. اَلیمی قارنیما چکیرم. آلتی آی شیمی‌درمانی سوره‌سینده، آریقلامیشام. قارنیمین نه پی‌یی قالیب، نه اَتی. کؤکسومده‌کی بیر جوت مووازی کیسیلمیش یارا ایزی بوتون حیاتیما یئترلی‌دی.
«بیر ده تزریقی پروتز وار»، دئمیشدی دؤکتور. مانتیتورداکی شکیللری بیر بَه بیر آچیرام. تزریقی پروتز نئجه اولا بیلر، دئیه، گوگل‌دن اوخویوب، شکیلینه باخیرام. ایضاحی یازیلارینی دا بیر بَه بیر اوخویورام. سیلیکون آدلی بیر مادّه کؤکسون جراحلیق اولان یئرینه نؤوبتی اولاراق زینه- زینه تزریق اولونوب، سورا دری‌نین آلتی قوووق کیمی شیشیر…
«گؤره‌سن قوووق دؤشون گیله‌سی اولماز؟»
کیمسه یوخدور سوآلیمی جوابلاسین. اَلیمی هامارلاشمیش کؤکسومه چکیرم. مانیتوردا پروتزلره عاید صحیفه‌لری بیر بَه بیر دییشیرم. لیفجی‌یه بنز‌ر بیر پروتز دیقّتیمی چکیر. پروتزین گیله‌لری دوغال گیله‌لره بنزه‌ییر.
شکیللره باخماغا دوام وئره بیلیمرم. گئنه طبیعی اولمالی‌یام. آزاد بوراخیرام اؤزومو. عادی باخیرام هر زادا. گیله اولور اولسون، اولمور اولماسین. نه اولدوغونا فیکیر وئریرم، نه ده اولمادیغینا. نه دؤشون وارلیغینی دوشونورم، نه ده یوخلوغونا. آنجاق هر زاددان اؤنملی ریلکس اولمالی‌یام. اؤزومو آزاد بوراخیرام کی غصّه اؤتوب کئچسین. نارین- نارین آغلاماق ایسته‌ییرم. آغلاییرام. سورا اؤکوتمه ووروب، هؤنکور- هؤنکور آغلاییرام…

آبان ۱۳۹۲

 ایضاح:
۱-  Wu- wei اسکی چین فلسفه‌سینده عادی و طبیعی داورانماق.
۲- – انکولوژیست: قان متخصیصی
۳- پسیکولوژیست: روانشناس

سایت ایشیق