+0 به یه ن / بپسند
| « سعادتنامه » |
|
|
| یازار : غلامحسین ساعدی / تورکجه یه چئویرن : علیرضا ذیحق | |
|
|
|
|
(1) ائو چایین اوزبه اوزونده ایدی. بالاجا و ساده بیر تاختا کؤرپو، چایین او أل بو ألینی بیر- بیرینه پاپیشدیریردی چایین او ألینده قارانلیق و تانینماز بیر بؤیوک مئشه وارایدی. هر گون آخشام چاغلاری، قوجاکیشی گلیب ایوانداکی راحات صندلده ایله شرکن پیپینی آلیشدیریب اورمانا گؤز تیکیردی. گنج آروادی ایسه دالینی اونا چئویره رکن اتاقدا خیاطلیق چرخی‌نین دالیندا اوتوروب باشینی دوموک ائدیردی. گاهدان بیرزاد تیکیردی و گاهدان‌دا اؤزونده اولوب توموردی. آخشام لارکی اولوردی، آرواد مئشه‌یه باخماقدان قورخوردی و دالداکی بالاجا پنجره‌دن دیشاری باخیردی. کیشی‌ده فیکر ائدیردی کی آروادی خیاط لیق و یاباشقا ائو ایشی‌لری ایله چالیشیری و اونا گؤره ده اونو راحات بوراخیب تکجه هردن بیر اوجا سسله آروادینی سسله‌ییب دئییردی: «زادجان، بوسسی ائشیدیرسن؟ نم نه جوردی اصلاً، چوخ عجیب‌دی! بیه یوخ؟
هر واخت داکی قادین، کیشی‌نین گونده‌کی تکرار سؤزلریندن یورولوردی گرامافوناساری گئدیب موسیقی سسی ایله اتاقی دولدوروردو. آمما سحرلرکی کیشی، اؤز مولک املاکینا باش چکمه‌یه گئدیردی، گنج آرواد گلیردی و ایوندا دورارکن ساعات لارلا اورمانا گؤز تیکیردی و آنلاشیلماز و تانینماز سس‌لره قولاق آسیردی. سحرلر بوغونتولو و توتقون بیر ایشیق، اورماندان گؤزه ویریردی و آنلاما سیغمایان باشقا بیر گونش، بوداغ لار و یارپاق‌لار آراسیندان بویلانیب اؤزونو آزاجیق گؤستره‌رکن، اومود وئریجی تانینماز بیر گولوش سسی، یئنی بیر گون چیخمانین موشتولوغونو مئشه اهلی نین قولاق لارینا چاتدیریردی.
آرواد، أری ائوده اولمایان چاغلاری اورمانا باخماقدان هئچ قورخموردی. بئله لیک له أر- آروادین یاشایشی بیر- بیر لریندن آیری، چوخ دینجلیک و آرامش له کئچیردی. کیشی چوخ‌دیللی باشلی، گولش قاباق، آزدانیشان و دیری باش بیر قوجا ایدی. همیشه گون چیخمادان یوخودان قالخیب چوخ سئوینج و راضی لیق لا ائوده او أل بو أله گئده‌رکن سماوری یاندیرماقلا سفره‌نی حاضیرلاییردی. سو قیزدیریردی و اوز به اوز پنجره نین پردهلرینی قیراغا وئره‌رکن اوتوروب گؤزله‌یردی کی گونش، مئشه آغاجلاری‌نین باشلارینا دوشوب اونلاری اؤز بویاسی ایله قیزیل لاندیرسین. سونرا یاتاق اُتاقینا گئده‌رکن خانیمی ناساری أییلیب اونو سسله‌یردی: «بالاجا خانیم! منیم جیققیلی میققیلی عزیز جانیم! دور داها، قوشلار آییلیب، گونش چیخیب، سن به آییلماق اسیته‌میرسن؟» آرواد گؤزونو آچیب چیگین‌‌لرینی آوووردی و کیشی ائودن چیخیب گئتمه‌یه نه جان، اوزاناق حالدا سقفه باخیردی و سونرا دوروب اوتورارکن قول- بیله‌گینی تومارلاییب فیکره جوموردی. ناهارکی اولوردی کیشی چوخ یوروقون حالدا، مولک املاکینا باش چکمک دن قاییدیردی و ایکی سی بیرلیکده أیلهشیب خؤره‌ک یئیه‌ندن سونرا، اوزو چؤله‌ساری آچیلان پنجره‌نین اؤنونده اوتورارکن کیشی باشلاییردی گولمه‌لی سؤزلر تاپیپ دئمه‌گه و کئچمیش دن سؤز آچماقا و او واخت دا کی آروادین سیماسیندا، کسالت و حوصله سیزلیک دویوردی، اِیوانا گئدیردی و اورمانا باخارکن اونوتک بوراخیردی. باجاردیقجا چالیشییردی کی جوان آروادی نین نازینی چکیب اونون هر زادینا دؤزه و اؤزوده ایسته ییردی کی گنج‌لر کیمی یاشاییب دولاناکی ائده بیلمیردی. همیشه اؤزتک لیگینده ، غصه‌له نیردی و بوجوره تئز آیاقدان دوشوب بالا- بالا آرادان گئتمه سینه تأسف له‌نیردی. دوشونوردی کی جوان آروادی دول قالاندان سونرا، گؤزه‌ل و گنج ایگیت لر بیر به بیر اوناساری گلیب اوایسه اونلارا خوش اوز گؤستریب یئنی بیر حیات باشلایاجاق. بوناگوره ایسه، گونده نئچه یول اورمانا ساری اوز دؤنده ریب دئیه‌ردی: - «منه یاردیم گؤسترین کی بو تئزلیک ده آرادان گئتمه‌ییب اوقدر یاشاییم کی خانیمیم دا اؤزوم کیمی قوجالیب بوکولسون. اوندا لاپ او پیس اؤلوم لره ده راضی‌یام.» هر واخت دا کی دعاسینی ائدیب قورتولوردی مئشه‌نین أن أل چاتماز بیر یئریندن، بیر جاناوارین سسینی ائشیدیردی کی «آمین» دئیه‌رکن برک دن اونا گولوردی. گنج آرواد یالقیز، یورقون، حیرص‌لی و سوسموش کیمین ایدی. کیشی‌نین باشینا دؤنوم قادانی آلیم سؤزلری اونا بیر اثر قویموردی. کیشی‌نین أل دن آیاقدان دوشمه‌سی اونودا خسته‌لن دیرمیشیدی. دالینی کی أرینه چئویریب چؤله ساری باخیردی، اوگونو دوشونوردی کی اؤلو آپاران بیر ماشین اوفوق دان تاپیلیر و دالیسیجادا نئچه ماشین قوهوم- تانیش دان و قارا کیراواتلی و أنلی کوره‌ک لی جوان لاردان یئتیریرلر و باشلارینی ترپهدرکن اوناکی قارا پالتارلار آراسیندان شمعدانی گولو کیمی ایشیلداییر، باشین ساغ اولسون دئییب گولومسه ییرلر. سونرا اوره‌کدن بیر آه چکیب «آمان تانریم» دئییردی. ائوده و اورماندا اولان بو سکوت، بو انتظاری داها آرتیق قیزیشدیریردی. یازیق کیشی آروادی‌نین اوره ییندن نه‌لر کئچدیگینی هئچ بیلمیردی. آخیرلاردا خانیمی نین یالوار یاخارینا گؤره و بوتک لیک‌دن چیخماغا خاطیر، کیشی راضی اولدوکی ائوین آشاغی مرتبه سینی اجاره وئرسین. بونا گؤره ایسه گون لرین بیر گونی، کیشی‌نین موباشیری قارا کیراواتلی و أنلی کوره‌ک بیر جوان کیشی ایله، اونلارا گلدیلر. قاپی نین زنگینی چالاندا، أر- آرواد یوخاری داکی پنجره‌دن بویلانیب باخدیلار. آرواد چوخ سئوینج ایله دئدی : «آه، مستأجر!» آروادین اوزونو گولوش بورویه‌رکن أری قاییدیب اوناباخدی. آرواد اؤز سئوینجینی گیزلتمک ایچون، تئز اؤزونو ییغیشدیردی، آمما أری اونون گولوش و سئوینجینی گؤرموش سه ده، اوزونه گلمه‌ییب بیرزاد دئمه‌میشدی. آمما ندنسه او گئجه ایلک دفعه اولاراق ألینه بیر کتاب آلدی کی آروادلارین مکریندن سوز آچمیشدی. مستأجرین او منطقه ده مأمور اولدوغونا باخمایاراق، گونده ایکی ساعات‌دان چوخ ائشیگه چیخمیردی. اُتاقینن بؤیوک پنجره‌سینی آچیردی و اورمانین قالابالیغینی و چؤلون سس سیزلیگینی سایمادان فیشقا چالیردی و اوزونی قیرخیردی. سویونوردی و اُتاقدا ورزش ائدیردی. قوجا کیشی ائوه گلرکن، جوان کیشی نین سس- کویونه قولاق آسیردی و سونرا یوخاری قالخیب آروادینی گؤروردی کی چوخ سئونیج و راضی‌لیق لا، یئمک پیشیرمک ده دی. مستأجر گلن‌دن، پیشمیش لرین ده رنگی دادی دگیشیلمیش دی. آخشام چاغلاری گنج کیشی، کپه نک اوولاماق ایچون چؤله چیخیردی و اِیوانین آلتیندان کئچرکن، چیی‌نی اوسته قویدوغو اوو تورونی گؤتورردی و چوخ احتراملا ائو یییه سی اولان آغا و خانیما سلام وئریردی. قوجا کیشی آزجا یئریندن قالخارکن، سلامین جوابینی آلیردی و ایچری ده کی کین و حیرصینی گیزلتمک ایچون، یالانچی بیر گولوش له اونو قارشیلاییردی. آمما ندنسه اؤزونی پوزقون لوقدان و جانینی سیخان پیرتلاشیق فیکیرلر جایناغیندان قورتارا بیلمیردی. گئجه لردن بیری، جوان کیشی فیشقا چالا- چالا پیللهلردن یوخاری قالخدی و بیر نئچه آن قاپی دالیندا دایانارکن اهمالجا قاپینی چالدی. أر- آرواد دوردولار و قاپی یا یاخین لاشاندا، نئچه آن بیر- بیر لرینه باخدیلار. قوجا کیشی قاپینی آچدی. جوان کیشی ایذین آلیب ایچری گیردی و أر آروادی اؤز اتاقینا شاما دعوت ائتدی. بو چاغیریش او قدر گؤزله نیلمز ایدی کی قوجا کیشی «گلن مه‌ریک» دئیه‌ن مه دی. جوان کیشی اونلارا تانینماز و عجیب بیر قوش اوولامیشدی و عطیرلی بیر چاخیرمیز اوستونده‌ایدی. شامدان سونرا اوتورب هر بیر یئردن سؤز آچدیلار. بالاجا و بؤیوک شهرلرده یاشاماقدان توتدو اؤز شخصی احوالاتلارینا جان بیر- بیرلرینه دانیشدیلار. جوان قادین چوخ اوجا سسله گولوردو و قوجا کیشی بیلیردی کی بو گولمک‌لرین آچیق- آیدین بیر علتی یوخدور. نئچه یول چالیشدی کی اورمانین سیرلاریندان و اورانین عجیب- غریب جاناوارلاریندان سوز آچسین. آمما مستأجر ایله گنج آرواد بو سوزلری دینله مک ایچون چوخ کؤنولسوز ایدیلر. چوان کیشی اوولادیقی کپه نک لری اونلارا گؤستریردی کی جانسیز حالدا ویترین دالینداکی آغ مخمل اوستونده قاناد آچمیشدیلار. ها بئله قوروتدوغو بیتگی لرین آلبومونو نشان وئریردی کی قوجا کیشی بئله نکی بیر زادلارا هئچ واخت اؤزونده بیر علاقه دویمامیشدی. گنج قادین بو آل الوان کپه‌نک لری گؤرمک ایچون چوخ سئوینجک اولموشدی. جوان کیشی ده باشلامیشیدی گوندوزون دردلی و غملی کپه‌نک لریندن و گئجه‌نین سئونیجک کپه‌نک لریندن سؤز آچیب دانیشماقا. نئچه گوندن سونرا نوبت قوجا کیشی یه یئتیرمیشدی کی جوان کیشی نی شاما دعوت ائتسین. هله گون باتمامیشدی کی گنج کیشی، پیللهلردن یوخاری چیخدی. قوجا کیشی ایله گنج کیشی اوز به اوز اوتوردولار. اونلار بالا- بؤیوک شهرلردن و باشدان ساودیقلاری واقعه‌لردن سوز آچدیلار. قوجا کیشی‌نین اوره یینده آمما بیر نیگران چیلیق وارایدی. پیرتلاشیق قافا ایله نئچه یول یئریندن قالخدی، ایوانا گئتدی و اورمانا ساری اوز دؤنده‌ریب دعا ائتدی: «منی اؤزون قورو آی‌تانری!» آرواد مطبخ‌دن ائشیگه چیخارکن میزین دالیندا اوتوروب باشلادی جوان لا صحبته قوجا کیشی ائشیتدی کی مستأجر، اونون آلدیقی تحصیلاتدان سوروشور و اودا واخت سیز أره گئتدیگیندن و اوخودوغو درسی قوهوم قارداشین ائتدگی اصرارلارا گؤره یاریمچیلیق بوراخماغیندان سؤز آچیر. گنج کیشی دئدی: «هله بئواخت اولماییب یئنه ده ائله یه بیلرسیز باشلاییب درس اوخویاسیز!» قادین آه چکدی و قوجا ظن ائتدی کی جوان کیشی ایندی اوره گینده اونا گولور. اورمان، سس سیز و قارانلیق ایدی و قوجا کیشی ایندی یه جان گؤرمه میشدی کی کیمسه کؤرپودن کئچمیش اولا. همیشه بو کؤرپونون نه ایچون چای اوزه‌رینه قویولماسیندان تعجب‌له نیردی. آمما او گئجه اؤز- اؤزونه دئدی: «کؤرپوده بیر حکمت وار. شبهه سیزکی اونو بیر أل قاییریب و بو ایشدن ده بیر منظور وارایمیش! کیمسه اونون اوستوندن کئچمه لی اولاجاق کؤرپونون گؤزویولداریر. نم کیمی گؤزله‌‌ییر، آمما اونون کیم اولدوغو بللی دئییل.» قاییتدی و اُتاقا گلدی. آرواد تئز اؤزونو ییغیشدیریب دویغولارینی گیزلتدی. جوان کیشی ده اؤزدیرناقلارینا باخیب تومدی. قوجا کیشی دئدی: «مئشه‌نین هاواسی چوغ آغیر، نملی و سویوق دی و هله ده کؤرپودن ... » گنج قادین و مستأجر باشلارینی چئویریب باشقا پنجره‌دن چؤله باخدیلار. یولدان بیر ماشین کئچیردی و اونون دال چراغی نین ایشیقی گاهدان گؤرسه نیرسه‌ده چوخ واخت دا گؤزدن ایتیردی. شام کی بالیق أتی ایدی یئدیلر و قوجاکیشی بالیق أتینی چوخ سئوه‌رسه ده، ندنسه هئچ یئیه‌نمه دی و تکجه بیر پییالا قاتیق یئمه‌یه کفایت لندی مستأجر شامدان صونرا بیر دسته ورق ائشیگه چیخاریب میزین اوستونه سپه‌له‌رکن انلاری اویونا دعوت ائتدی. قوجا کیشی دئدی: «چوخ بئواخت دی. گئجه نین بو واختی اویونا گیریشمک اولماز.» گنج کیشی، ورق‌لری ییغیشدیریب دئدی: «دوغرودان دا ائله بئواخت دی. قالسین گلن گئجه‌لره!» آرواد اونون سؤزونی قبول ائتمک ایچون باشینی ترپهدرکن، قوجانین کؤنلونه اضطراب چؤکوب اوره‌گی‌نین باشینا بیرزاد آغیرلیق ائتدی. «گلن گئجه‌لرندیرمی؟ داها قورتولمادی مگر؟» دئیه چوخ پوزقون حالدا ایوانا گئدیب اورماناگؤز تیکدی کی عجیبه بیر حالدا بؤیویوب شیشه‌رکن دووارکیمی اوجالمیشدی. اهمالجا اؤز- اؤزونه دئدی: «بوجاناوار لار ألیندن هارایا گئتمک اولار؟ نه ایش گؤرمک اولار؟» سونرا پیپیی‌نی آلیشدیردی و چوخ چکمه‌دن یئره بوشالتدی. اود توتموش نارین توتون‌لر قیزیل پیله‌ک لر کیمی یئره ساوریلدی. قوجاکیشی چایین قیراغینا دوشن ایشیلتی دا، قوشا بنزه‌ر بیر بؤیوک جاناوار گؤردوکی اوزون آیاقلاری وارایدی و بیرجه دانا تئله‌ک ده اونون لوت بدنینده گؤرسن‌میردی. قوش دایانمیشدی و اونا باخیردی. آمما چوخ دؤزمه‌دی. نئچه آن سونرا باشینی اهمالجا ترپهدرکن چایاساری گئتدی و بیر بوداغا مینه‌رکن سودان کئچیب اورماناچاتدی. قوجاچوخ قورخدی. اتاقا قایتیدی و دئدی: «هئچ بیلدینیز نه اولدی؟ عجیبه بیر قوش ایوانین آشاغی‌سیندا دایانیب منه باخیردی. اوزون آیاقلاری و لوت بدنی وارایدی. سودان کئچدی و اورمانا گئتدی.» مستأجر دئدی: «حتماً کی تولکی ایدی.» آرواد دا دؤنوب أرینه دئدی: «قولاغ آس گؤر نه دئییره‌م، من قرارا گلدیم کی صاباح گئجه‌دن باشلایام، بو آغادا منه یاردیم گؤستره‌جک‌دیر»، قوجانین جانینا اوشوتمه دوشدی و دئدی: -«نه‌یی باشلایاجاقسان؟» قادین دئدی: - :«ایسته‌ییره‌م یئنی‌دن باشلایام درس اوخویام.» قوجانین اوره‌یینی قورخونج بوردودی و او گئجهنی سحره‌جان، یاتاقیندا تیتره‌ییب اسدی و ایللر بویو تانری‌یا اینامسیز اولورسادا، بوتون گئجهنی تانری- تانری دئییب دعا اوخودی. 3 درس باشلانمیشدی، قوجا بیلمیردی هاردان باشلاییب‌لار. جوان آروادین ألینده همیشه کتاب اولورسادا، کتاب‌دان چوخ اؤز رؤیالاری‌له چالیشیردی. داها موسیقی‌یه آز قولاق آسیردی وجور به جور پیشمیش‌لر دوزه‌لدیردی. اورمانا باخان پنجره‌نین پردهلرینی چکه‌‌رکن اوتوروب دیشاری‌یا باخیردی. خیاطلیق چرخینی بوراخارکن ائو ایشلری ایله چوخ چالیشیردی. قوجا کی ایشدن قاییدیردی، آرواد آیاغا قالخیب چوخ مهربان حالدا اونو قارشیلارکن سؤزلرینه جاواب وئریردی. آمما قوجا داها قاباقکی لارکیمی، اونون نازینی چکمیردی و ایوانداکی صندلده راحات اوتورانمیردی. اونون نظرینه هرزاد داغیناق و پیرتلاشیق گؤرسه‌نیردی. نئچه ایللر اینامسیزلیق دان سونرا، یئنه دعا کتابلارینی ورق‌لیردی. ایلک دفعه اولاراق قارانلیق و نابلد بیر ماغارایا گیره‌ن انسانلارکیمی، حس ائدیردی کی اونا قارشی اولان توطئه‌لردن قورتولماق ایچون غیب عالمیندن یاردیم آلمالیدی. نییه کی اونون توتقون بویالی اورماندان باشقا و او چیپپلاق قوشون گتیردیگی خبرلردن علاوه، آیری دایاقی یوخ‌ایدی. یئنی‌دن ناماز و عبادته باشلامیشدی. و اومود ائدیردی کی بئله لیک‌له حیاتیندا دینجلیک و آرام لیقا أل تاپاجاقدیر. نئچه گئجه دوشوندی و نهایتده تصمیم توتدو کی درس ساعاتلاری اونلارین یانیندا اولا. گئجه‌لرکی مستأجر اونلارین اتاقینا گلیردی، قوجا کیشی اورمانا باخماقدان گؤز اؤرتوردی و اونلارایله اوز به اوز اوتوروردی. آرواد دیل- دوداغینی چئینه‌رکن اؤزونی سایمازلیقا ویریردی و جوان کیشی ده دیرناقلارینی تاماشا ائدیردی. قوجا گؤزونو اونلاردان گؤتوره‌رکن مرتب دوشونوردی کی هاچاناجان بو ایشه دوام وئره‌جک لر. گؤره سن اونلارین آراسیندا باشقا بیر ایلگی ده وارمی؟ گؤره‌سن سحرلر ائودن دیشاری چیخدیقیندا، بیر پارا ایش‌لر ائوده اوز وئریرمی؟ آمما جوان قادین گوندن گونه گؤزل له شیردی و مستأجرین أه‌نینده هر گون یئنی بیر پالتار گؤرسه‌نیردی. گؤره‌سن او دؤره برده باشقا بیر کیمسه وارکی مستأجر، جور به جور پالتارلاری اونا خاطیر گئیمیش اولسون؟ قوجا کیشی گئجه‌لری چوخ گئژ یاتیردی و سحرلر چوخ تئز یوخودان قالخیب و آروادینی آییلتمامیش چؤله چیخیردی. فیکر ائدیردی کی او دیشاری چیخدیقدا آرواد یوخودا اولسا یاخشی‌دیر. هم ده مستأجرین اوزونی سحرلر گؤرمه‌یه هئچ گؤزو یوخ‌ایدی. آمما قوجا کیشی کی ائودن آرا آچیردی، جوان کیشی چؤلدن دردیگی بیر دسته گول‌ایله، پیل‌له‌لری اهمالجا یوخاری چیخیب یاتاق اتاقینا گیره‌رکن گول‌لری میز اوسته قویوردی و یاواش- یاواش قاییدیردی. قاپینی کی اؤرتوردی، گنج قادین گؤزلرینی آچیب او گول لره کی باشلارینی اهمالجا ترپتمک له اونا سحرین خیر اولسون دئییردیلر، گولوردی.
4 بیر گون کی قوجا کیشی، عجیب غریب بیر دعانی اسگی بیر کتاب دان اوخودو، لوت قوش تاپیلدی. گون باتانا یاخین‌ایدی کی اوقوش بالاجا فانوس لا، بیر بوداغا مینه رکن چایدان کئچدی. ایوانین آلتینا گلدی و قوجا کیشی یه کی راحات صندلده أیلهشیب پیپ چکیردی، علامت وئردی. قوجا أییلیب باخارکن قوشو تانیدی آمما اؤزونو سایمازلیقا ویردی. قوش، فانوسی تر پتمک‌ایله اونو آشاغی‌یا سسله‌‌دی. قوجا کیشی دوردی آیاغا و اتاقدان کئچرکن گنج قادین لا مستأجر اونا باخدیلار. آرواد سوروشدی: -«هارا؟» قوجا دئدی: - «قاییدیرام». آرواد اونون نگران سیماسینا باخدی و مستأجرکیشی، راحاتلیق دویوب گولدی. قوجا آشاغی‌یا گئتدی. قوش فانوسی بیر داش اوسته قویوب و قوجانان اوز به اوز اوتوروب سوروشدی: «نه ایسته‌ییرسن؟ منله نه ایشین‌وار؟» قوجا دئدی: منه یاردیم ائله! قوش دئدی: چوخ ناراحات‌سان؟ قوجا دئدی: آز قالیر دلی اولام. قوش دئدی: یورقون لوغون و أل آیاقدان دوشمه‌یین قیافه‌ن دن بللی‌دیر. قوجا دئدی: سؤزون دوز دور، چوخ یورقونام. شبهه منی یازیق ائله‌ییب. قوش دئدی: نییه داریخیرسان؟ قوجا دئدی: داریخماییم نئیله ییم به؟ قوش دئدی: سنه بیر موشتولوق گتیرمیشم. سن ائتدیگین دعالاری اورماندا ائشیدیب‌لر! قوجا دئدی: ایندی نئیله مه‌لی یم؟ قوش دئدی: ائتدیگین دعالارا دوام وئر. قیرخ گئجه تامام. قیرخینجی گون سنه عیان اولاجاق دیر قوجا دئدی: قیرخ گون تامام؟ قوش دئدی: بلی، دوز قیرخ گون تامام. دؤزومون اولسون و اومودنو اوزمه؟ قوجا دئدی: قوجالیق منی اینجیدیر و اؤلوم دن قورخورام. قوش دئدی: قورخودان فایدا یوخدور. عاقیللی و دوشونجه‌لی اول. قوجا دئدی: من عاقیللی و دوشونجه‌لی ایدیم. آمما ایندی داها ناخوش و یازیقام. قوش دئدی: ائله بونا گؤره ده، سنه یاردیم گؤستره‌جک لرکی راحات اولاسان! قوجا دئدی: سنین سؤزلرین منی سئویندیره‌رکن اومودومو آرتیریر. قوش دئدی: اومودون اولسون، صاباح گئجه یئنه ده گله جه‌یم. بیر- بیرلریندن آیریلدیلار. جوان قادین مستأجردن آرا آچدی و کتابا ساری أگیلدی. آمما قوجا کیشی اونلاری سایمادان اتاقدان کئچیب اِیوانا گئتدی و چایا گؤزتیکدی. قوش ألده فانوس، بیر بوداغا مینه‌رکن سودان کئچدی و او أله یئتیره‌نده، قوجا أللرینی ترپه‌در کن سسلندی: «الوداع اولسون لوت قوش!» و قوش جاواب وئردی: «هله‌لیک آی لوت!» آرواد ، مستأجره باخدی. مستأجر سوروشدی: «نه خبر اولوب؟» آرواد دئدی: «هئچ نه آنلامیرام.» آمما قوجا کیشی اونلارین سسینی ائشیتمیردی. فیکری ذکری اورماندا ایدی و او آندان کی قوش فانوسینی سؤندورموشدی. اروماندان آنلاشیلماز بیر های- کویون سسی، قولاغا چاتیردی. اونا بنزه ییردی کی اورمانین بوتون جاناوارلاری قوشی دؤوره‌له ییب هی سورغو- سؤال ایدی کی اوندان ائدیرلر. شیرین بیر هالای- کوی ایدی. قوجا باشینی أل لری آراسیندا توتوب اؤزو ایله دئدی: «ای منیم بئینیمین ارومانیندا اولان جاناوارلار، من کیمی خبرسیز بیر لوت دن نه ایسته‌ییر سینیز؟»
5 قوجا کیشی اطرافیندا نه‌لر کئچدی‌یی گؤرمه‌دن، هر گئجه او دعانی تکرار ائدیردی. بولور گولدانا قویولان گول لری سایمادان، آروادین بوسبوتون دگیشلمه‌سینه باخمادان و مستأجرین اوزلولویونو اؤزونه آلمادان، گون چیخمامیش ائودن چیخیردی و جوان بیر سئرچه یه کی تلگراف سیم‌لری اوسته قونوردی دئییردی : «سلام عزیز دوست. بوگون ییرمی دؤردونجی گوندی. اونون آلتی گوندن سونرا منه عیان اولاجاقدی.» و جوان سئرچه قاناد آچیب اورمانا ساری گؤتورله‌نیردی. قوجا کیشی آخشام باشلاری باشقابیر سئوینج ایله ائوه قاییدیردی و خؤره‌ک یئیه‌ندن سونرا اوتوروب او لوت قوشی گؤزله‌ییردی. اولوت قش هر گئجه گلیردی و فانوسون ترپه نیشی له، قوجانی آشاغا چکیب صحبته توتوردی کی مستأجر ایله گنج قادین، داها آرتیق بیر- بیر لرینه یئتیره‌بیلسین‌لر. قوش اوقدر خوش صحبت و شیرین دانیشیق ایدی کی قوجا اونون صحبتیندن أل اوزه نمیردی. زامانین کئچمه‌سینی بیلمه‌‌دن گاهدان ساعاتلارلا بیرلیکده اوتوروب دانیشیردیلار. اوقوش یئر اوزونون أن سیرلی و صمیمی وارلیقی دئمک‌ایدی. قوش سوروشدی: «سن ائله بیل اونلارین بیر یئرده اوتوماق لاریندان ناراحات سان؟» قوجا دئدی: البت کی ناراحاتام! قوش دئدی: نییه آخی، نه ایچون؟ قوجا دئدی: اگر بیله‌م کی درس‌دن باشقا آیری بیر شیئ ده اونلارین آراسیندا وار، منیم ایچون بیر بؤیوک توهین اولوب. قوش دئدی: سن اؤزون، عؤمرونده بو توهین لردن ائله مه ییب سن؟ قوجا دئدی: یوخ، هئچ واخت. قوش دئدی: دوزونو دئه، حقیقتدن بوتون اورمانین خبری وار! قوجا دئدی: .... نییه .. بیر دفعه .... قوش دئدی: تعریف‌له گؤروم ... قوجا دئدی: جوان چاغلاریمدا، قونشولوغوموزدا ألدن آیاقدان دوشموش یازیق بیر قوجا وارایدی و اونون بیر گنج خانیمی .... قوش گولوب و دئدی: سونراسی بللی دیر... چوخ یاخشی ... دونن گئجه هانسی دعانی اوخودون؟ قوجا دئدی: اوتوز اوچونجو دعانی! قوش گولوب و دئدی: چوخ قالماییب. یئددی گوندن سورا سنه عیان اولاجاق دی... او آنلاردا کی کؤرپونون اؤنونده او ایکی سی بیرلیکده آددیملاییب دانیشیردیلار مستأجر، آروادین أللرینی ألینه آلیب سوروشدی: «بو قوجانان یاشاماقدان یورولماییب‌سان؟» آرواد جواب وئردی: چاره‌م یوخدور، نئیله‌یه بیللم؟ کیشی دئدی: نییه اونو بوراخمیرسان؟ آرواد دئدی: گوناه دی آخی، بیله‌سینه اوره‌ییم یانیر! کیشی دئدی: اوره‌یین اؤزونه یانسین، اوره‌یین بو گؤزه‌ل لیگه یانسین کی گونو گوندن سولغون لاشیر. آرواد دئدی: قسمت بوایمیش! کیشی دئدی: آیریل‌گینا، باشقا بیر یول تاپ! آرواد دئدی: قورخورام. کیشی دئدی: ندن قورخوسان؟ بیر واخت دا کی بوتون دونیا سنی سئوه‌بیلر، بیر واخت داکی من همیشه لیک سنین فیکرینده‌یم.... قوجا کیشی قوش دان آیریلیب پیپینی پیل‌له‌لرده اودلایارکن، اتاقا گیردی. آرواد لا کیشی بیر- بیر لریندن آرا آچدیلار. قوجا دئدی: «وضع- اوضاع نه حالدادی؟ درس لر هئچ قاباغا گئدیرمی؟ مستأجر چوخ اوزلولوک له دئدی: «برک عالی دی!»
6 قیرخینجی گونده، گون باتان چاغی ایدی کی قوجا کیشی چوخ توتقون و نگران حالدا، ایواندا اوتورموشدو و قادین ایله مستأجرده، اونون نگران و قرارسیز اولدوغونو آنلامیشدیلار. قوجاهی دوروب آددیملاییردی و أللرینی ایوانین نرده‌سینه قویارکن، اورمانا و کؤرپویه گؤز تیکیردی و چایا باخیب توموردی. قادین ایله کیشی اونون احوالینا باخیب قاش- گؤزایله بیر- بیرلرینه اشاره ائدیردیلر. قوجا دوشونوردی کی اگر او وعده سینه عمل ائتمه‌یه، نه قاباغا گلمه‌لی دیر. ائله او آنحا بیردن، اؤلو آپاران بیر ماشینین قیژیلتی سینی ائشیتدی و گنج قادین لا مستأجرین اوجادان هیریلداییب گولمک‌لرین و جنازه ماشینی اوزاقلاشدیقجا اونلاریندا یاخین لاشماق لارین و کتابلارین جیریلماسینی. آمما هاوا قارانلیق اولمادان اول، اورمانین سیخ و بویلانان آغاجلاری آراسیندان، بیر کیشی کی دیلنچی لیک تورباسی چیگنینده و اوزون چلیک ألینده‌ایدی، گؤزه گؤرسندی و کؤرپودن کئچرکن ایوانین آلتیندا دایاندی. قوجا تیتره‌ک آیاغلاری ایله آیاغا قالخدی و اتاقدان کئچرکن آشاغی یئندی. قوجا قورخوب تیتره‌رکن اونا یاخین لاشدی و «او» کی اوجا بویلو بیر کیشی ایدی ألینی قوجانین باشینا قویوب دئدی: «ای یازیق انسان، من سنه عیان اولدوم ایندی کی سنه ظاهر اولموشام، نه چتین لیگین وارسا منه دئه ! اوره‌یین نه ایسته‌ییرسه منه دئه.» قوجا «او» نون أزیش- بوروش و پیرتلاشیق قباسیندان یاپیشارکن دئدی: «اوزون عؤمور ایسته‌ییره‌م!» او دئدی: اوزون عؤموری نه ایچون ایسته‌ییرسن؟ قوجا دئدی: ایسته‌ییره‌م اومندن سونرا بئله‌نکی جاناوارلار ألینه دوشمه‌یه؟ او دئدی: سنین گئتمه‌گین له کی حیات قورتولماییر. سندن سونرا هر شئ ممکن‌دی اولا، سن گئده‌ندن سونرا هر نه اولور اولسون، سنه نه فرق ائده‌جک؟ قوجا دئدی: تکجه بو قادین‌لا کیمسه نین ایشی اولماسین. او دئدی: نییه؟ قوجا دئدی: پاخیل‌لیق، پاخیل‌لیق منی اؤلدورور. او گولوب دئدی: چوخ یاخشی، ایندی منله گل! قوجانین ألیندن یاپیشیب کؤرپودن کئچه‌رکن و اورمانا گیردیلر. قوجا اورمانین هاواسیندا، غریبه بیر آغیرلیق، سویوق لوق و نم‌لیک دویدو. آغاجلار آراسیندان کئچرکن قوجانین اوره‌گینده آمانسیز بیرنگران چیلیق یووا سالمیشدی و تانیش بیر زادین دالسیجا گزیردی. قورخوب تیتره‌رکن سوروشدو :«او هاردادی؟» جواب ائشیتدی: «لوت قوش باشقا بیرتاپشیریق دالی‌سیجا گئدیب!» بو خبر کیشی‌نین قورخوسونو قات با قات آرتیردی. قاییتدی و اورمانین پیرتلاشیق بوداغ لاری آردیندان، اؤز ائوینی گؤردوکی اتاقین ایشیقلی چراغی، ایوانی و اونون بوش صندلینی ایشیلدادیر. قاییتماق ایسته‌دی آمما، او برک دن اونون قولوندان یاپیشمیشدی. اورمانین توتقون و قالا بالیق یئرلرینه کی چاتدیلار، آریق جیلاز و اوجا بویلو بیر کیشینی گؤردولر کی دالینی اونلارا چئویره‌رکن، چوخ بؤیوک بیر بای‌سی‌کئل چرخینی آغاجلارین بیرینه دایامیشدی. آیاق سسی ائشیده‌رکن ألینی اوزالتدی و قوجانین بیله‌گیندن توتارکن، اؤزونه ساری چکدی و اونو چرخه میندیریب باشلادی یئل کیمی سوروب آغاجلار آراسیندان کئچمه‌یه. ایره‌لی گئتدیکجه اونون اوزون أللری قوجانین جانینی باجاردیقجا سیخیردی. قوجا دالی یا دؤنوب اونون اوزونه باخماقا اوره‌ک ائله میردی. چرخچی نین سویوق و دؤندرایجی نفس‌لری بوینونون کؤکونه توخوندوقجا، اونو حالسیز و حرکت سیز ائدیردی. قوجا نئچه یول اینیلده‌دی و چرخچی‌دن سوروشدو: «هارا گئدیریک؟» آمما چرخچی نین کؤکسونده‌کی سویوق دان باشاقا بیرزاد یوخ ایدی، جواب وئره‌نمه دی. گئجه دن چوخلی کئچیردی و گئتدیکجه ده بالا- بالا اورمان ایشیقلانیردی. گئجه اولدوغونا باخمایاراق، قوجا لاپ بالاجا بوئوجک لرین یئری مه سینه یارپاقلاردا و بوداغلاردا گؤروردو. بویوک بیر گئجه ایدی و اونلار یئل کیمی اوزاقلاشیردیلار. قوجا کی جاندان دوشموشدی یالواریجی حالدا سوروشدو: «سن اول تانری دئه گؤروم منی هارا آپاریرسان؟ چرخچی، بیر سسله کی ائله بیل میس شیپوردان چیخیردی، دئدی: «اورا» و لاپ اوزون بارماقی‌له درین بیر باتلاقی گؤستردی کی نئچه آددیم‌لیق دا، عیان اولدی.
7 قادین ایله گنج کیشی، نئچه ساعات دان سونرا قوجانین غیب اولماسینی آنلاییب ایوانا چیخدیلار. دیلنجی بیر کیشی نی گؤردولر کی کؤرپو اوستونده اوتوروب و بیرزاد یئییر. جوان آرواد اونو سسله‌ییب سوروشدی: «قوجا بیر کیشینی بو طرف‌لرده هئچ گوروبسن؟» دیلنچی دئدی: گؤردوم، او بیر اوزون یولون یولچوسو اولدی. اوزاق بیر سفره چیخدی. آرواد چوخ نگران چیلیق لا سوروشدی: سفره چیخدی؟ نه سفرینه؟ دیلنچی دئدی: اوره‌یی‌نیزی اونا خاطیر سیخمایین. او هله بو تئزلیک‌لرده گلن دئییل. آروادین جانینا اضطراب دوشدی. آمما اونداکی جوان کیشی‌نین أللری اونون وجودونا حلقه‌لندی، یئنی بیر دینج لیک و آرام‌لیق حس ائتدی. و او آنداکی لوت قوش بیر بوداغا مینه‌رکن کؤرپویه یاخین لاشیردی، مستأجر کیشی گنج آروادی یاتاقا آپاردی. آمما آرواد اؤزونو اونون ألیندن قورتاردی و بیر اویون هاواسی سئچه‌رکن گرامافونا ساری گئتدی. نئچه مدت‌دن سونرا، موسیقی سسی یئنه قادینین اتاقینی دولدورموشدو. -یانغییام. آی آمان بو سوسوزلوغون الیندن. ائوین اورتاسیندا سالینان یورقان دؤشک دن دوروب،اوتوردو. قیپیق گؤزلرینی آچماغا چالیشیردا، چالیشمیردا. قاباغیندا کی بوش دووارا باخماغا باشلادی. - هانی؟ گؤزلرینی قیسیب گئنه گؤزگزدیریر. دووار بوم بوش دور. دوروب بوش سوشوشه لرینی آشیرا آشیرا دووارا یئتیشیر. باخیب بیر عکس چریتگه سینین ایزینی گؤرور. - به هارا گئتدی؟ الینی دوارا سورتور. - هه دئدیم دای بو پالتار سنه یاراشاجاق، نه قیسطی میسطی، بیر دؤنه گئیمهگه گؤره ده اولسا دهیر. آرخاسنیا کئچیب بوینونا باخیر، طاماهی دوشور . الینی بوینونا سورته سورته دووارین توزو الینه چیخیر. - به هانی بو عکس? آلنینی دایاییر دووارا. - نه یوموشاق دی بو سینه لر، ائله بیل پانبوغا باتمیشام. خانیم نارین نارین گولدو. - آی گؤرمه میش بسدی نفسیم باتدی. آلینینی دوواردان آییریب کئچیر آینانین قاباغینا. آلینینداکی قیزاران یئر، گؤینهییردی. دویمه لرینی باغلاییب، لاپ بئله آخیر دویمه نی ده باغلاییر. - من دن یاخشی مدیر کل چیخار. آمما عکس هاردادی؟ الینی باشینا قویوب، فیکیرله شیر. - دونن عکس نه بتر یانارمیش. قوی آینادا اؤزومه باخیم. دونن گئجه کی آلوون ایستیسینه اوزومون دریسی یانیب، لاپ داغ چی لارا اوخشامیشام. اوزوندن سوزلوب یئره آخان تره باخدی. - عکسلریم یانا یانا پیستیکلیلره اوخشاییردیم، هه حیطده تونقال قالامیشدیم. عکسلر یانیب توستو اولوردولار. قاپی دؤیولدو، قونشوایدی،دئدی: - آی قونشی بیر یئر اود توتوب? -یوخ قارداش چرشنبه ائلهمیشم. -به نییه بئله هیسی وار ائویمیزی دولدوردو. - صاباح گلیب اؤزوم سیلهرم گئجون خیره قالسین. قاپی نی قونشونون اوزونه چیرپدی. یادا اؤرتدی. یادا آچبق قویدو...... -ائله بیل ایندی عکسلری یادیرغامیشام. موبایلینی آختاریر. عکسلرین بیریسینه دونوخور : - به تک نییه سنون موبایلون وار? به نییه منیم موبایلیم اولماسین? -گل بو سنون، هله قیسطیندن چوخ قالیر -به سن? -من اؤزومه بیر گون آغلارام....... بوش واتا قابلارینی داغیدا داغیدا گئدیب یئتیشیر موبایلینا. شارژرین زوغونو چیخاردیب موبایلین قالئریسینه گئدیر - هه بو داهانا تاپدیم. عکسی تاپیب آسلاییر میخدان. عکس ترسهسینه قالیر. الینی آتیب موبایلی دوواردان گؤتورنده دیرناغی دوواری جیزیر.موبایلی سول الینه وئریب ساغ بارماغینی سومورا سومورا موبایلی قویور یئره. - اَتیم جیجیشدی. گئنه ده واتا قابلارینی داغیدا داغیدا قاییدیب یئرینده تیرله نیر. بؤیرونده کی شیشه نی گؤتوروب قانتاریر -هه ایندی اولدو، اؤزومه گلدیم. دؤنوب موبایلداکی کیچیک گؤرسه نن عکسه باخیر - توپوغا باخ ائی.... بیر آز زامان کئچنده عکسین رنگی روفو قاچیر، بیر آز دا سونرا عکس گئدیب موبایلین صفحه سی قارالیر - به من لاپ چوخ زامانا قویموشدوم به نه اولدو ؟نوکیا دا سی..... بیردن موبایلین شارژسیزلیق سسی قالخیر. دوروب گئنه یئرده کی واتا قابلارینی شوتله یه شوتله یه موبایلا یومولور. نورسوز صفحه نی آچیب عکسی تاپیب باسیر دویمه یه. دیلیت له قالسین دویمه لرینی سئچمکده بارماغی اویناییر. گلینین بوینونا دونوخور..... -نه یامان توپوغو.... موبایلین صفحه سی قارالیر. دیلیته نه قدر باسیر سا، قارا صفحه یئرینده قالیر - نییه یادیمدان چیخیر بو زهری ماری... موبایلی تولازلاییر دووارا ساریموبایلین اوچ تیکه اولموش گؤودهسی دوشور فرشین اوستونه. بیر قورتوم دا قانتاریب : -آی سنی سنی، بو موبایل دا سنه وورولوب. بیرده شوشه نی گؤتوروب قانتاردی. سوسوز لوق سوموگونه یئریدی. ائبیله واتا قابلاری بوش ایدیلار. گرک باققالا زنگ ووروب تزه واتالار ایستهیه. ائو تلفونونو گؤتوروب زنگ ائله مک ایسته ییر: -بورجوزو وئر مه ییبسیز خطیز بیرباشلی اولوب. دوروب قبضلری آختارماغا باشلاییر. توپا قبضلرین بیریسی دوشور یئره، تاریخینه باخیر -دده اونن نه قدر بو قبضلری ساخلاماغا بازی وارایدی. ائله بیل نه وار بو قبضلرده. هه اوگون ایدی، خططین بیر باشلی اولماغینا هدهقه بیچمیشدیلر. قبضی گیزلتمه گه چالیشمیشدی، یادا فیکیرینده ایدی اونو گیزلتسین، آمما حتما گئنه یادیندان چیخمیشدی. - والله قالمیشام، پولو تؤکه تؤکه گینه خطی بیر باشلی ائله ییبلر والله بو موخابیرات دا قاتیب. - یوخ من بیلیرم منیم درس اوخوماغیم، اؤزوده آزاد دانیشگاهیندا، سنی داردا قویوب. یاناغی بیر اؤپوشله قیزیشدی. ایلکه خانیمیندان بئله بیر گلیش گؤرمه میشدی. واری کبین آدیلا الیندن چیخسایدی دا دَیَردی بو اؤپوشه. بو تزه خانیم نه قدر قاناجلقلی ایدی. آمما تهراندا درس اوخویوردو. بوش یورغان دؤشه گه کئچیب بیر هفته قاباقکی منظرهنی خاطیرلاییردی. اوزونو سوخوردو ساچلارا: - وای نه خوش عطیری وار بو ساچلارین. ساچلاری اؤپنده، بالیشین ساچاقلاری گیردی آغیزینا یورغانی لوله لهییب هئی کرکیندی یورغانا. دؤشک ایسلاندی. آمما تزه لیکده دای ایچندن بری دؤشک ایسلانمیردی. دویونجاق واتا قابی وار ایدی دؤرهسینده. دؤنوب بوش ایشکافا باخاندا کوچه ده بیری قیشقیردی: کؤنه باشماغی اولان.... اونون دانیشگاهدان قبول اولدوغو عکس او بوش ایشکافدا ایدی. - اونا کئک بزه تدیرمیشدم. دئدی: کئک دادیخیب، یا من هئیله ائشیتدیم. یا آلاهیسی اوسؤزو دئدی. نه بیلیم ائ.هله باشیم قیزیشماییب، نه اولار سحر اولاندا ، من آخشامی گوده بیلمهرم. گئنه شوشهنی گؤتوروب قانتاردی. -قارنووون ایچی یانسین باققال سندن خبر اولمادی دای. جییریم یاندی، آی بو سوسوزلوغون ائوی ییخیلسین. گؤزو خاطیره دفتر لرینین بیرینهساتاشدی.اوخوماغا باشلادی یازیلمیشدی: - هه خانیمیم فارغ التحصیل اولان گونو منیم یاناغیمدان اؤپدو. نئچه گون سونرا کرجده ایشتاپمیشدی. نئیله‌ییم اووجومو اییله مه میشدیم کی تحصیلاتین بو ایشلری ده وار. اولسون سئودیگم خانیمی ائوه باغلاییب اوزمه یه جه گم کی، هئی اود گتیر، سو گتیر دئمه یه جه یم کی، پالتار یو ، اوتو چک یوخ اوایش تاپیب. من آرخاسیندا دورمالی یام. کرج ده کی ایشیبئله لاپ بوتو واختلی اولسادا. ورقله دی: - اونا ائو لازیم ایدی یاخشی توتدوم. یئریندن دیبیرلانیب نئچه واتا شوشهسینی آشیردی. بیریسینده سو وارایدی ، چکدی باشینا -بو نه دی؟سودوک ایسی?هه، یادیما دوشدو گئجه اونا ایشه میشم. اولان اولدو. گئنه دفتره باخدی: - من اردبیلده او کرج ده. ایشینین اولیدی، نه اولار. مرخصی آلیب گئدیب باش چکرم...... نئچه واراغی آتلاندی: -دای گئجه لر یورغانا دیره ییرهم. ایلکه آروادیمین نین بوشانماغیندان قورخموشام، یا دای دهتله یه دهتله یه ..یا سویو پیله یه پیله یه ایچیرم...نه بیلیم?.... نئچه واراق سونرا..... - هر گئجه تلفونلا بو اوزون یولا کؤرپو سالیب یاخین لاشیرام آروادیما. بیر الیم تئلفوندا بیر الیم..... دای باجی لاریم دا دیله گلیب لر: بو نه ایشدی، درسینی اوخودون قاییت گل بورادای،آخی بوردا ایش یوخدی؟ یازیلمیشدی: _جاواب، یوخ ،یوخ دی، ایدی. گئنه واراقلاری اوخودو: _ الو سلام نازیم دونن گئجه دانیشانمادین، اوره ییم بیر دامجی اولوب سنه، اسنهمک سسیندن سونرا تئلفون دانیشدی. _ یامان یورغونام بوگئجه، بیلمیرسن کی نه قدر ایشیم وار ایدی بوگون، منی شعبه رئیسی وئریرلر. نئچه ورق سورا : - دئیه سن بو دانیشماقلاریمیز سئیرهلیب.گئت گئده ده لاپ سئیره لیر. سونراکی یازی: -ایشیم وار سورا دانیشاریق هله لیک واراقلار سئیره لیر : _ آیین بیری جاواب سیز تماس، آیین ایکیسی جاواب سیز تماس ....جاوابسیز تاماس، جاواب من سنه زنگ ائله‌رم، جاواب اس ام اس : - سورا زنگ ائلهرمم. _ ائله بیل خط بیر طرفلی ایشله ییر. خط وئرمیر، سونوک دی نئچه واراق سونرا: -آخی آی دیرناقسیز، سن منیم پولومنان اوخویوب لیسانسآلدین، ایندی منه ایفاده ائله ییرسن، گؤرسنه نئچییه باخار سونراکی یازی: - آتلانیب میندیم اوتوبوسا، ائلهبیل برزیله کیمین یول گئتدیم. دفتری باغلاییب ال آتیب بؤیرونده کی شوشه نی گؤتوروب قانتاردی. - قیزیشدیم ائی، دوروم توشوم حیطه. آیاغا دوروب بوش سوقابلارینی شوتله یه شوتله یه دوشور حیطه، حوضون قیراغیندا دفتری آچیب نئچه واراغی چئویردی: - به گئجه نین بو واقتی بو هاردادی. سونراکی یازی: - گینه الیمی باسدیم زنگه. یوخخبر یوخدی. قونشونون زنگینی ووردوم. قونشو ائف ائف دن دانیشدی: -بفرمایین -سلام خانیم منم بؤیور قونشوزون اری - بعلی بعلی حالوز نئجه دی خانم نئجه دی -والله ائله اونی ایستیردیم سیزدن سوروشام، موبایلی سؤنوک دی، قاپینی دا آچمیر، ائوه ده زنگ ویریرام گؤتورن یوخدی. -به خبروز یوخدی، نئچه گون قاباق داشینیب گئتدیلر. - نئجه یانی گئتدیلر، هارا گئتدی? -والله دئدی سازمانی ائو وئریبلر، داشینیرام اورا. -آدرسینی بیلیرسیز -یوخ. سونراکی یازی: - دوشوب یولا گئتدیم شیرکتینه. بو کرج تهران یولو نه قدر رهله ییز دی، حییف دؤیور اردبیل. اون دیقه یه هر یئره یئتیشیرسن. هاگئت، هاگئت ایندی یئتیشرسن، یوخ ائله بیل بو یول قورتاران دؤیور شوفره دئدیم: - همشهری به بو شیرکت هاردا. منه باخیب گولومسوندی: - داریخما قیدش ایندی چاتاریق. سونراکی یازی: - یئتیشدیک شیرکته.شوفره دئدیم گود گلیرم.گئتدیم شیرکتین گودکچوسونون قاپی سینا.دئدیم: - آی قارداش آچ قاپینی. - نه وار نه اولوب؟ - ایشیم وار. گلیب قاپینی آچدی. دئدیم: -یورولمایاسان قاداسین آلیم همشهری اردبیلی خانیمی تانی ییرسان بوردا ایشله ییر. -هه، تزه لیکده ده رئیس اولوب. -هه قاداسین آلیم یامان ایشیم دوشوب اونا -به ایندی نییه گلیبسن ایندی او یئددی یوخونون ایچینده. -والله بتر واجیبدی گرک الان اونو گؤرم -صاباح سحر گل گؤر -ایندی گرک گؤرم -کئچ گئت من ایندی خالغین ائوینه زادینا زنگ ائله یه بیلمهرم. سونرا: جیبیمین توزون آلدیم. -ساغ اول قاداسین آلیم . سونرا: قاییدیب میندیم ماشینا. - هارا -هتله...... قاپی دویولور. بیری الینی قویوب زنگه ائله باسیر. دوروب والایلایا والایلایا گئدیر قاپی یا. -قاپی دؤین - آچ نامه وارون. جارقاق جارقاق قاپینی آچیر.بیر سرباز نامهنی اونا اوزادیب وئریب دفتری قاباغینادوتور. -امضالا -گل بو دا سنین ایمضون یادیگار ساخلا. ائوه کئچیب نامه نی آچیر. - نه ؟گل کبینی وئر یوخسا ائله اولار بئله اولار، گل نفغه وئر یوخسا ائله اولار بئله اولار.... قاییدیب نامه نی آتیر حوضون قیراغینا.بیر سیقاری داماغینا قویوب آلیشدیریب، دریندن سومورو. واراقلاری یئل چئویریر: - هتلین تختیندن آیاغا دوروب گئتدیم او نامهنی آچیب بیرده باخام. کئچدیم توالتین ایچینه. دئدیم: - بو بیزیم ائویمیزین موبلوندان راحاتدی. سونرا، دای دئمه سحره کیمین تووالت فرنگی نین اوستونده اوتوروب یاتمیشام. موبیلیم زنگ چالدی. -نه عجب آخیردا زنگ ائله دون. قولاق آسیرام. -هه بیلدیم روز رستورانی، دئدیگین خیاوان آخشام دوققوز. .... خیاوانلاری دولانیب آخشام ساعات دوققزدا کئچدیم رستورانا. قوروق اولموش میز صندلین یانیندا اوتورموشام. بیر خانیم لا بیر او آغا لاردان بیریسی شام یئییرلر . خانیم منی گوروبنرنگ آلیب رنگ وئردی..... گئجه گئتمیشم قاپیسینا زنگ چالیرام. دئییر: - گئت بوردان -دئییرم شامی شیرکت مودورینن یئدین باری چایی مننن ایچ. دئییر: - گئت یوخسا پیس اولار. دئییرم: -پیس، به بوندان پیسی ده اولار ، آدی منیم دادی اؤزگه نین. سونراکی یازی: بیرآزدان یوز اون پولیس لری گلیب منی آپاریب باسیرلارقودوخلوغا.دئییرم: -آی باشوزا دؤنوم او منیم آروادیمدی -ایچیبسن هه، گئت قاضی نین یانینا. - آی قاضی آد منیم دی، داد..... اوتوز شاللاق ، همشهریم سن، ایچیبسن.دای اورالاردا گؤرسنمه. -آخی اومنیم آروادیم دی. -قانون یولوندان گئت...... سونراکی یازی: - قانون کوره ییمی، بئلیمی قارالتدی. دفتری قیراغا قویور. قانونن کیتابی یاغیش آلتیندا قالیب داهادا قالین لاشمیشدی. ائله بیل ایکی قات اولموشدو. -هر نه اولسا سویا چکیلیب، هاهاهاه. قانون کیتابینی الینه آلیب اویاندان بویانا بویاندان اویانا ورقله دی، آمما دوداغینی بوزدو . _ هر نه وارمن دن سونرا . کبین کاغازینی ، محکمه کاغازینی گؤتوروب کئچدی ائوه. -بونلار ائکیز دیلر. اؤگئی منم. یورقان دؤشه گین اورتاسینا گیریب شوشه نی گؤتوروب بیر بارداق دولوسو آغ نانا قورصونا اوخشاربیر قورصلارین اوستونه تؤکدو. قورصلار فیشیلداماغا باشلادی. گؤتوررب بارداغا باخیب دئدی: - حسن سوخدی دییرمانی دی.
چکدی باشینا ....... منبع اصلی : http://www.rezahamraz.com
|
»