حیدر بابایه سلام-شهریار

(۱)

حیدربابا ، ایلدیریملار شاخاندا

سئللر ، سولار ، شاققیلدییوب آخاندا

قیزلار اونا صف باغلییوب باخاندا

سلام اولسون شوكتوزه ، ائلوزه !

منیم دا بیر آدیم گلسین دیلوزه

(٢)

حیدربابا ، كهلیك لرون اوچاندا

كول دیبینَّن دوشان قالخوب ، قاچاندا

باخچالارون چیچكلنوب ، آچاندا

بیزدن ده بیر مومكون اولسا یاد ائله

آچیلمیان اوركلرى شاد ائله

(٣)

بایرام یئلى چارداخلارى ییخاندا

نوروز گولى ، قارچیچكى ، چیخاندا

آغ بولوتلار كینكلرین سیخاندا

بیزدن ده بیر یاد ائلییه ن ساغ اولسون

دردلریمیز قوى دیّكلسین ، داغ اولسون

(٤)

حیدربابا ، گون دالووى داغلاسین !

اوزون گولسون ، بولاخلارون آغلاسین !

اوشاخلارون بیر دسته گول باغلاسین !

یئل گلنده ، وئر گتیرسین بویانا

بلكه منیم یاتمیش بختیم اویانا

(٥)

حیدربابا ،‌ سنون اوزون آغ اولسون !

دؤرت بیر یانون بولاغ اولسون باغ اولسون !

بیزدن سورا سنون باشون ساغ اولسون !

دونیا قضو-قدر ، اؤلوم-ایتیمدى

دونیا بویى اوغولسوزدى ، یئتیمدى

(٦)

حیدربابا ، یولوم سنَّن كج اولدى

عؤمروم كئچدى ، گلممه دیم ، گئج اولدى

هئچ بیلمه دیم گؤزللرون نئج اولدى

بیلمزیدیم دؤنگه لر وار ،‌ دؤنوم وار

ایتگین لیك وار ، آیریلیق وار ، اولوم وار

(٧)

حیدربابا ، ایگیت اَمَك ایتیرمز

عؤمور كئچر ، افسوس بَرَه بیتیرمز

نامرد اولان عؤمرى باشا یئتیرمز

بیزد ، واللاه ، اونوتماریق سیزلرى

گؤرنمسك حلال ائدون بیزلرى

(٨)

حیدربابا ، میراژدر سَسلننده

كَند ایچینه سسدن - كویدن دوشنده

عاشیق رستم سازین دیللندیرنده

یادوندادى نه هؤلَسَك قاچاردیم

قوشلار تكین قاناد آچیب اوچاردیم

(٩)

شنگیل آوا یوردى ، عاشیق آلماسى

گاهدان گئدوب ، اوردا قوناق قالماسى

داش آتماسى ، آلما ،‌ هیوا سالماسى

قالیب شیرین یوخى كیمین یادیمدا

اثر قویوب روحومدا ، هر زادیمدا

(١٠)

حیدربابا ، قورى گؤلون قازلارى

گدیكلرین سازاخ چالان سازلارى

كَت كؤشنین پاییزلارى ، یازلارى

بیر سینما پرده سى دیر گؤزومده

تك اوتوروب ، سئیر ائده رم اؤزومده

(١١)

حیدربابا ،‌ قره چمن جاداسى

چْووشلارین گَلَر سسى ، صداسى

كربلیا گئدنلرین قاداسى

دوشسون بو آج یولسوزلارین گؤزونه

تمدّونون اویدوخ یالان سؤزونه

(١٢)

حیدربابا ، شیطان بیزى آزدیریب

محبتى اوركلردن قازدیریب

قره گونون سرنوشتین یازدیریب

سالیب خلقى بیر-بیرینن جانینا

باریشیغى بلشدیریب قانینا

(١٣)

گؤز یاشینا باخان اولسا ، قان آخماز

انسان اولان بئلینه خنجر تاخماز

آمما حئییف كور توتدوغون بوراخماز

بهشتیمیز جهنّم اولماقدادیر !

ذى حجّه میز محرّم اولماقدادیر !

(١٤)

خزان یئلى یارپاخلارى تؤكنده

بولوت داغدان یئنیب ، كنده چؤكنده

شیخ الاسلام گؤزل سسین چكنده

نیسگیللى سؤز اوركلره دَیَردى

آغاشلار دا آللاها باش اَیَردى

(١٥)

داشلى بولاخ داش-قومونان دولماسین !

باخچالارى سارالماسین ، سولماسین !

اوردان كئچن آتلى سوسوز اولماسین !

دینه بولاخ ، خیرون اولسون آخارسان

افقلره خُمار-خُمار باخارسان

(١٦)

حیدر بابا ، داغین ، داشین ، سره سى

كهلیك اوخور ، دالیسیندا فره سى

قوزولارین آغى ، بوزى ، قره سى

بیر گئدیدیم داغ-دره لر اوزونى

اوخویئدیم‌ « چوبان ، قیتر قوزونى »

(١٧)

حیدر بابا ، سولى یئرین دوزونده

بولاخ قئنیر چاى چمنین گؤزونده

بولاغ اوتى اوزَر سویون اوزونده

گؤزل قوشلار اوردان گلیب ، گئچللر

خلوتلیوب ، بولاخدان سو ایچللر

(١٨)

بیچین اوستى ، سونبول بیچن اوراخلار

ایله بیل كى ، زولفى دارار داراخلار

شكارچیلار بیلدیرچینى سوراخلار

بیچین چیلر آیرانلارین ایچللر

بیرهوشلانیب ، سوننان دوروب ، بیچللر

(١٩)

حیدربابا ، كندین گونى باتاندا

اوشاقلارون شامین ئییوب ، یاتاندا

آى بولوتدان چیخوب ، قاش-گؤز آتاندا

بیزدن ده بیر سن اونلارا قصّه ده

قصّه میزده چوخلى غم و غصّه ده

(٢٠)

قارى ننه گئجه ناغیل دییَنده

كولك قالخیب ، قاپ-باجانى دؤیَنده

قورد گئچینین شنگولوسون یینده

من قاییدیب ، بیرده اوشاق اولئیدیم

بیر گول آچیب ، اوندان سورا سولئیدیم

(٢١)

عمّه جانین بال بلله سین ییه ردیم

سوننان دوروب ، اوس دونومى گییه ردیم

باخچالاردا تیرینگَنى دییه ردیم

آى اؤزومى او ازدیرن گونلریم !

آغاج مینیپ ، آت گزدیرن گونلریم !

(٢٢)

هَچى خالا چایدا پالتار یوواردى

مَمَد صادق داملارینى سوواردى

هئچ بیلمزدیك داغدى ، داشدى ، دوواردى

هریان گلدى شیلاغ آتیب ، آشاردیق

آللاه ، نه خوش غمسیز-غمسیز یاشاردیق

(٢٣)

شیخ الاسلام مُناجاتى دییه ردى

مَشَدرحیم لبّاده نى گییه ردى

مشْدآجلى بوز باشلارى ییه ردى

بیز خوشودوق خیرات اولسون ، توى اولسون

فرق ائلَمَز ، هر نولاجاق ، قوى اولسون

(٢٤)

ملك نیاز ورندیلین سالاردى

آتین چاپوپ قئیقاجیدان چالاردى

قیرقى تكین گدیك باشین آلاردى

دولائیا قیزلار آچیپ پنجره

پنجره لرده نه گؤزل منظره !

(٢٥)

حیدربابا ، كندین تویون توتاندا

قیز-گلینلر ، حنا-پیلته ساتاندا

بیگ گلینه دامنان آلما آتاندا

منیم ده او قیزلاروندا گؤزوم وار

عاشیقلارین سازلاریندا سؤزوم وار

(٢٦)

حیدربابا ، بولاخلارین یارپیزى

بوستانلارین گول بَسَرى ، قارپیزى

چرچیلرین آغ ناباتى ، ساققیزى

ایندى ده وار داماغیمدا ، داد وئرر

ایتگین گئدن گونلریمدن یاد وئرر

(٢٧)

بایرامیدى ، گئجه قوشى اوخوردى

آداخلى قیز ، بیگ جورابى توخوردى

هركس شالین بیر باجادان سوخوردى

آى نه گؤزل قایدادى شال ساللاماق !

بیگ شالینا بایراملیغین باغلاماق !

(٢٨)

شال ایسته دیم منده ائوده آغلادیم

بیر شال آلیب ، تئز بئلیمه باغلادیم

غلام گیله قاشدیم ، شالى ساللادیم

فاطمه خالا منه جوراب باغلادى

خان ننه مى یادا سالیب ، آغلادى

(٢٩)

حیدربابا ، میرزَممدین باخچاسى

باخچالارین تورشا-شیرین آلچاسى

گلینلرین دوزمه لرى ، طاخچاسى

هى دوزولر گؤزلریمین رفینده

خیمه وورار خاطره لر صفینده

(٣٠)

بایرام اولوب ، قیزیل پالچیق اَزَللر

ناققیش ووروب ، اوتاقلارى بَزَللر

طاخچالارا دوزمه لرى دوزللر

قیز-گلینین فندقچاسى ، حناسى

هَوَسله نر آناسى ، قایناناسى

(٣١)

باكى چى نین سؤزى ، سووى ، كاغیذى

اینكلرین بولاماسى ، آغوزى

چرشنبه نین گیردكانى ، مویزى

قیزلار دییه ر « آتیل ماتیل چرشنبه

آینا تكین بختیم آچیل چرشنبه »

(٣٢)

یومورتانى گؤیچك ، گوللى بویاردیق

چاققیشدیریب ، سینانلارین سویاردیق

اویناماقدان بیرجه مگر دویاردیق ؟

على منه یاشیل آشیق وئرردى

ارضا منه نوروزگولى درردى

(٣٣)

نوروز على خرمنده وَل سورردى

گاهدان یئنوب ، كولشلرى كورردى

داغدان دا بیر چوبان ایتى هورردى

اوندا ، گؤردن ، اولاخ ایاخ ساخلادى

داغا باخیب ، قولاخلارین شاخلادى

(٣٤)

آخشام باشى ناخیرینان گلنده

قودوخلارى چكیب ، وورادیق بنده

ناخیر گئچیب ، گئدیب ، یئتنده كنده

حیوانلارى چیلپاق مینیب ، قوواردیق

سؤز چیخسایدى ، سینه گریب ، سوواردیق

(٣٥)

یاز گئجه سى چایدا سولار شاریلدار

داش-قَیه لر سئلده آشیب خاریلدار

قارانلیقدا قوردون گؤزى پاریلدار

ایتر ، گؤردون ، قوردى سئچیب ، اولاشدى

قورددا ، گؤردون ، قالخیب ، گدیكدن آشدى

(٣٦)

قیش گئجه سى طؤله لرین اوتاغى

كتلیلرین اوتوراغى ، یاتاغى

بوخاریدا یانار اوتون یاناغى

شبچره سى ، گیردكانى ، ایده سى

كنده باسار گولوب - دانیشماق سسى

(٣٧)

شجاع خال اوغلونون باكى سوقتى

دامدا قوران سماوارى ، صحبتى

یادیمدادى شسلى قدى ، قامتى

جؤنممه گین تویى دؤندى ، یاس اولدى

ننه قیزین بخت آیناسى كاس اولدى

(٣٨)

حیدربابا ، ننه قیزین گؤزلرى

رخشنده نین شیرین-شیرین سؤزلرى

تركى دئدیم اوخوسونلار اؤزلرى

بیلسینلر كى ، آدام گئدر ، آد قالار

یاخشى-پیسدن آغیزدا بیر داد قالار

(٣٩)

یاز قاباغى گون گونئیى دؤیَنده

كند اوشاغى قار گولله سین سؤیَنده

كوركچى لر داغدا كورك زویَنده

منیم روحوم ، ایله بیلون اوردادور

كهلیك كیمین باتیب ، قالیب ، قاردادور

(٤٠)

قارى ننه اوزاداندا ایشینى

گون بولوتدا اَییرردى تشینى

قورد قوجالیب ، چكدیرنده دیشینى

سورى قالخیب ، دولائیدان آشاردى

بایدالارین سوتى آشیب ، داشاردى

(٤١)

خجّه سلطان عمّه دیشین قیساردى

ملا باقر عم اوغلى تئز میساردى

تندیر یانیب ، توسسى ائوى باساردى

چایدانیمیز ارسین اوسته قایناردى

قوورقامیز ساج ایچینده اویناردى

(٤٢)

بوستان پوزوب ، گتیرردیك آشاغى

دولدوریردیق ائوده تاختا-طاباغى

تندیرلرده پیشیرردیك قاباغى

اؤزون ئییوب ، توخوملارین چیتداردیق

چوخ یئمكدن ، لاپ آز قالا چاتداردیق

(٤٣)

ورزغان نان آرموت ساتان گلنده

اوشاقلارین سسى دوشردى كنده

بیزده بویاننان ائشیدیب ، بیلنده

شیللاق آتیب ، بیر قیشقریق سالاردیق

بوغدا وئریب ، آرموتلاردان آلاردیق

(٤٤)

میرزاتاغى نان گئجه گئتدیك چایا

من باخیرام سئلده بوغولموش آیا

بیردن ایشیق دوشدى اوتاى باخچایا

اى واى دئدیك قورددى ، قئیتدیك قاشدیق

هئچ بیلمه دیك نه وقت كوللوكدن آشدیق

(٤٥)

حیدربابا ، آغاجلارون اوجالدى

آمما حئییف ، جوانلارون قوجالدى

توخلیلارون آریخلییب ، آجالدى

كؤلگه دؤندى ، گون باتدى ، قاش قَرَلدى

قوردون گؤزى قارانلیقدا بَرَلدى

(٤٦)

ائشیتمیشم یانیر آللاه چیراغى

دایر اولوب مسجدیزون بولاغى

راحت اولوب كندین ائوى ، اوشاغى

منصورخانین الی-قولى وار اولسون

هاردا قالسا ، آللاه اونا یار اولسون

(٤٧)

حیدربابا ، ملا ابراهیم وار ، یا یوخ ؟

مكتب آچار ، اوخور اوشاقلار ، یا یوخ ؟

خرمن اوستى مكتبى باغلار ،‌ یا یوخ ؟

مندن آخوندا یتیررسن سلام

ادبلى بیر سلامِ مالاكلام

(٤٨)

خجّه سلطان عمّه گئدیب تبریزه

آمما ، نه تبریز ، كى گلممیر بیزه

بالام ، دورون قویاخ گئداخ ائممیزه

آقا اؤلدى ، تو فاقیمیز داغیلدى

قویون اولان ، یاد گئدوبَن ساغیلدى

(٤٩)

حیدربابا ، دونیا یالان دونیادى

سلیماننان ، نوحدان قالان دونیادى

اوغول دوغان ، درده سالان دونیادى

هر كیمسَیه هر نه وئریب ، آلیبدى

افلاطوننان بیر قورى آد قالیبدى

(٥٠)

حیدربابا ، یار و یولداش دؤندولر

بیر-بیر منى چؤلده قویوب ، چؤندولر

چشمه لریم ، چیراخلاریم ، سؤندولر

یامان یئرده گؤن دؤندى ، آخشام اولدى

دونیا منه خرابه شام اولدى

(٥١) عم اوغلینان گئدن گئجه قیپچاغا

آى كى چیخدى ، آتلار گلدى اویناغا

دیرماشیردیق ، داغلان آشیردیق داغا

مش ممى خان گؤى آتینى اویناتدى

تفنگینى آشیردى ، شاققیلداتدى

(٥٢)

حیدربابا ، قره كولون دره سى

خشگنابین یولى ، بندى ، بره سى

اوردا دوشَر چیل كهلیگین فره سى

اوردان گئچر یوردوموزون اؤزونه

بیزده گئچك یوردوموزون سؤزونه

(٥٣)

خشگنابى یامان گونه كیم سالیب ؟

سیدلردن كیم قیریلیب ، كیم قالیب ؟

آمیرغفار دام-داشینى كیم آلیب ؟

بولاخ گنه گلیب ، گؤلى دولدورور ؟

یاقورویوب ، باخچالارى سولدورور ؟

(٥٤)

آمیر غفار سیدلرین تاجییدى

شاهلار شكار ائتمه سى قیقاجییدى

مَرده شیرین ، نامرده چوخ آجییدى

مظلوملارین حقّى اوسته اَسَردى

ظالم لرى قیلیش تكین كَسَردى

(٥٥)

میر مصطفا دایى ، اوجابوى بابا

هیكللى ،ساققاللى ، تولستوى بابا

ائیلردى یاس مجلسینى توى بابا

خشگنابین آبروسى ، اَردَمى

مسجدلرین ، مجلسلرین گؤركَمى

(٥٦)

مجدالسّادات گولردى باغلاركیمى

گورولدردى بولوتلى داغلاركیمى

سؤز آغزیندا اریردى یاغلاركیمى

آلنى آچیق ، یاخشى درین قاناردى

یاشیل گؤزلر چیراغ تكین یاناردى

(٥٧)

منیم آتام سفره لى بیر كیشییدى

ائل الیندن توتماق اونون ایشییدى

گؤزللرین آخره قالمیشییدى

اوننان سورا دؤنرگه لر دؤنوبلر

محبّتین چیراخلارى سؤنوبلر

(٥٨)

میرصالحین دلى سولوق ائتمه سى

میر عزیزین شیرین شاخسِى گئتمه سى

میرممّدین قورولماسى ، بیتمه سى

ایندى دئسك ، احوالاتدى ، ناغیلدى

گئچدى ، گئتدى ، ایتدى ، باتدى ، داغیلدى

(٥٩)

میر عبدولون آیناداقاش یاخماسى

جؤجیلریندن قاشینین آخماسى

بویلانماسى ، دام-دوواردان باخماسى

شاه عبّاسین دوربونى ، یادش بخیر !

خشگنابین خوش گونى ، یادش بخیر !

(٦٠)

ستاره عمّه نزیك لرى یاپاردى

میرقادر ده ، هر دم بیرین قاپاردى

قاپیپ ، یئیوب ، دایچاتكین چاپاردى

گولمه لیدى اونون نزیك قاپپاسى

عمّه مینده ارسینینین شاپپاسى

(٦١)

حیدربابا ، آمیر حیدر نئینیور ؟

یقین گنه سماوارى قئینیور

داى قوجالیب ، آلت انگینن چئینیور

قولاخ باتیب ، گؤزى گیریب قاشینا

یازیق عمّه ، هاوا گلیب باشینا

(٦٢)

خانم عمّه میرعبدولون سؤزونى

ائشیدنده ، ایه ر آغز-گؤزونى

مَلْكامِدا وئرر اونون اؤزونى

دعوالارین شوخلوغیلان قاتاللار

اتى یئیوب ، باشى آتیب ، یاتاللار

(٦٣)

فضّه خانم خشگنابین گولییدى

آمیریحیا عمقزینون قولییدى

رُخساره آرتیستیدى ، سؤگولییدى

سیّد حسین ، میر صالحى یانسیلار

آمیرجعفر غیرتلى دیر ، قان سالار

(٦٤)

سحر تئزدن ناخیرچیلار گَلَردى

قویون-قوزى دام باجادا مَلَردى

عمّه جانیم كؤرپه لرین بَلَردى

تندیرلرین قوزاناردى توسیسى

چؤركلرین گؤزل اییى ، ایسیسى

(٦٥)

گؤیرچینلر دسته قالخیب ، اوچاللار

گون ساچاندا ، قیزیل پرده آچاللار

قیزیل پرده آچیب ، ییغیب ، قاچاللار

گون اوجالیب ، آرتارداغین جلالى

طبیعتین جوانلانار جمالى

(٦٦)

حیدربابا ، قارلى داغلار آشاندا

گئجه كروان یولون آزیب ، چاشاندا

من هارداسام ، تهراندا یا كاشاندا

اوزاقلاردان گؤزوم سئچر اونلارى

خیال گلیب ، آشیب ، گئچر اونلارى

(٦٧)

بیر چیخئیدیم دام قیه نین داشینا

بیر باخئیدیم گئچمیشینه ، یاشینا

بیر گورئیدیم نه لر گلمیش باشینا

منده اْونون قارلاریلان آغلاردیم

قیش دوندوران اوركلرى داغلاردیم

(٦٨)

حیدربابا ، گول غنچه سى خنداندى

آمما حئیف ، اورك غذاسى قاندى

زندگانلیق بیر قارانلیق زینداندى

بو زیندانین دربچه سین آچان یوخ

بو دارلیقدان بیرقورتولوب ، قاچان یوخ

(٦٩)

حیدربابا گؤیلر بوتون دوماندى

گونلریمیز بیر-بیریندن یاماندى

بیر-بیروزدن آیریلمایون ، آماندى

یاخشیلیغى الیمیزدن آلیبلار

یاخشى بیزى یامان گونه سالیبلار

(٧٠)

بیر سوروشون بو قارقینمیش فلكدن

نه ایستیور بو قوردوغى كلكدن ؟

دینه گئچیرت اولدوزلارى الكدن

قوى تؤكولسون ، بو یئر اوزى داغیلسین

بو شیطانلیق قورقوسى بیر ییغیلسین

(٧١)

بیر اوچئیدیم بو چیرپینان یئلینن

باغلاشئیدیم داغدان آشان سئلینن

آغلاشئیدیم اوزاق دوشَن ائلینن

بیر گؤرئیدیم آیریلیغى كیم سالدى

اؤلكه میزده كیم قیریلدى ، كیم قالدى

(٧٢)

من سنون تك داغا سالدیم نَفَسى

سنده قئیتر ، گویلره سال بوسَسى

بایقوشوندا دار اولماسین قفسى

بوردا بیر شئر داردا قالیب ، باغیریر

مروّت سیز انسانلارى چاغیریر

(٧٣)

حیدربابا ، غیرت قانون قایناركن

قره قوشلار سنَّن قوپوپ ، قالخاركن

او سیلدیریم داشلارینان اویناركن

قوزان ، منیم همّتیمى اوردا گؤر

اوردان اَییل ، قامتیمى داردا گؤر

(٧٤)

حیدربابا . گئجه دورنا گئچنده

كوراوغلونون گؤزى قارا سئچنده

قیر آتینى مینیب ، كسیب ، بیچنده

منده بوردان تئز مطلبه چاتمارام

ایوز گلیب ، چاتمیونجان یاتمارام

(٧٥)

حیدربابا ، مرد اوغوللار دوغگینان

نامردلرین بورونلارین اوغگینان

گدیكلرده قوردلارى توت ، بوغگینان

قوى قوزولار آیین-شایین اوتلاسین

قویونلارون قویروقلارین قاتلاسین

(٧٦)

حیدربابا ، سنون گؤیلون شاد اولسون

دونیا واركن ، آغزون دولى داد اولسون

سنَّن گئچن تانیش اولسون ، یاد اولسون

دینه منیم شاعر اوغلوم شهریار

بیر عمر دور غم اوستونه غم قالار