+0 به یه ن / بپسند
نبی كسدیی قوربانین باشینی توربا ایچینه قویدو . قوربانین گؤزلری برهلنمیشدی.
مریم: - قورخوبدور،- دئیه، آزجا فیكیرلشدی. اؤزونو اونون یئرینه قویدو.- آتام اونا بیر گیله سو دا وئرمهدی،- دئدی- من ده اولسایدیم قورخاردیم. مخصوصن ده كی بیچاغ كوت ایدی. ایكی دفعه دالبادال چكندن سونرا دا باش بدندن آییریلمادی. من اولسایدیم، چوخدان اؤدوم چاتلامیشدی. بلكه اونون دا اؤدو چاتلاییب. اؤیله اولسا یاخشی اولوب، چونكی گؤرمهییب، آتام اللریایله قالانینی بیر- بیریندن آییردی.
نبی قوربانین باشینی اوولانمیش سئرچه باشی كیمی اوزدو. ساكین احوالی وار ایدی. یئره، دووارا، اطرافا، حتتا اوزونه سپهلهنمیش قاندا اونو سارسیتمامیشدی. توربانی زئرزمینین دیب- بوجاغیندان تاپدی. آغزینی باغلاماغا چالیشدی. ایپ تاپا بیلمهیینجه، توربانین آغزینی اللری ایله بیر یئره ییغیب، گلین باشینین توری كیمی چوخلو چین وئریب، اوْوجونون ایچینده كیپ-كیپ توتوب یولا دوشدو.
آتامین بو ایشینی آنلایا بیلمهدیم. نئجه كی، آنامین گئجه یاریسی فاضیلی بیر ات تیكهسی كیمی چیینینه آتیب، های- كوی ایله، قیشقیرا- قیشقیرا, دهشت دولو گؤزلرله، آغلایا- آغلایا ائودن قاچماغینی. نهدن منی اؤزویله آپارمادی؟ هارا گئتدی؟
نبینین آددیملاری آغیر ایدی. ائله بیل دونیانین بوتون آغیر داشلارینی اونون قیچلارینا باغلامیشدیلار. فیكره دالمیشدی. آخشام ائوه گلدییی زاماندان ، ائلهدییی ایشلری بیر فیلم كیمی گؤزدن كئچیرمهیه باشلادی. آمما نهدنسه فیلمی، قیریق-قیریق ایدی. بو حادیثهیه موقصصیر آختاریردی. كیمین چوخ گوناهی وار ایدی؟ - اؤزوندن سوال ائله دی. بیلمه دی! اؤزو م مو؟ همنمی؟ مریممی؟، یا...
جاوابسیز قالینجا اؤزونه چوخلو حاقلار وئرمه یه باشلادی:
- من كیشییم،- دئدی- آللاهین امریدیر. آللاه دئییبكی، یاخشی ایش گؤرون، جهاد ائلهیین. منده اونون یولوندا بو ایشلری گؤردوم. عاییلهمی جهننم اوتوندان قوروماق منیم وظیفهمدی. چونكی اونلارین صاحیبییم. همن گرهك مندن ایطاعت ائلهیهیدی.همنین گوناهی مندن چوخدور، سؤزومه قولاغ وئرسه ایدی، بوجور اولمازدی.
همن:- دیلییین دیشله كیشی،- دئدی،- صاباح بیر قریش یئرده یاتاجاقسان. او جاواب وئرن گونوین فیكیرلش، سونرا آغزییین هاوایا آچ، هاداران- پاداران دانیش.
نبی مانقالینین اودونو پوفلهیه-پوفلهیه:- دیل چیخارتمیسان!- دئدی،- بو سؤزلری او آداما بنزهمز قارداشینمی سنه اؤیرهدیر؟
همنین گؤزلری دولدو:- ال چك بو ایشلریندن كیشی،- دئدی،- او هله كیچیك بیر اوشاقدیر. باشا سالما بیلهسینی. آییندیرما، بو سؤزلر اونونچون چوخ تئزدی. نئچه ایلدی یولدان كئچهنی، باققالدان توتدو چاققالاجان. قاپی-باجا دا كی، فامیلدهكی، كیشیلری منه تیكه توتوبسان، بابالیمی یویوبسان دینمهمیشم. سوسموشام، آمما بونا دؤزه بیلمهرم آرتیق. او دا منیم قارداشیمدیر. بونو آنلامالیسان! منیم اوندان سونرا كیمسَم یوخدور.
آتامین آیاغی آسفالتین چوخورلارینین ایچینه گیردی و دیزی اوستونده یئره ییخیلدی. چتینلیكله یئردن قالخدی. دیزلری اینجیمیشدی، قیرمیزی بیر شئی شالوارینین آلتیندان بیر دیزیندن آخمایا باشلادی، آمما، سایمادی، یولونا داوام ائتدی. توربانین ایچینده كینین قانی داملا-داملا آسفالتین اوستونده اهیری- بویرو بیر خطط سالمیشدی. گئجه یاریسی اولدوغوندان گؤرونموردو.
آتام هارایا گئتدینی اؤزو ده بیلمیردی. هر یئره سسسیزلیك چؤكموشدو. یالنیز دریانین سسی گلیردی.
همن آغلاییردی. قویوب گئدهجهیم آرتیق،- دئییردی،- آمما اؤزو ده یاخشی بیلیردی كی، هئچ بیر یئره گئده بیلمز. یعنی قویوب گئتمهیه یئری یوخویدو. بو شهر ده اولدوغونا گؤره بو موصیبتدن قورتولمانین همیشه ایكی یولو وار ایدی و او هر ایكیسیندن ده قورخوردو.
همن بورنونون سویون چكه-چكه داوام ائتدی:- داها جانا دویموشام. ایشلهمیرسن، كیشیلر كیمی گمیله سویا گئتمیرسن. هئچ اولمازسا بیر نئچه بالیق آخشامدان-آخشاما الینده ائوه گتیره بیلرسن. آمما اونو دا ائلهمیرسن. سن كی ائو-اوشاق نه دیر بیلمیهجه ایدین. نییه اوچ اوشاغی منیم باشیما قویدون؟
نبی بیر تپیك یاغ شورباسینین قابلاماسینا ووروب، یاغسیز، یئرآلماسیز شوربانی یئرله- یئكسان ائلهدی: - منه، نه! دوغمویایدین اوچ اوشاغی،- دئدی.
همن یاواشجا:- دهدم ائویندن كی، گتیرمهمیشم.- دئدی:- سنین ائوینده دوغموشام. كئفه باخان زامان، بو گونلرین ده فیكرینی ائلهیهیدین، نه ایندی كی، مانقال باشیندان قالخیبسان.
آتاملا- آنامین سؤزلریندن هئچ باش قورتارا بیلمیردیم. فاضیل قورخموشدو. اونو باغریما باسیب اوتاغین كونجونده تئلئویزیون ماساسینین آرخاسینا گیردیم. بوتون بو صحنهلری ماسانین دالیندا اولان بیر دهلیكدن گؤروردوم و قورخوردوم آمما, اؤز قورخولاریمی گیزلتمهلی ایدیم كی فاضیل چوخ قورخماسین.
مریم ماسانین دالیندا تئز- تئز دیرناقلارینی چئینهییردی و او های- كویون ایچینده تك بیر آرزوسو وارایدی، داوانین تئز قورتولماسی. فیكیری آخشامچاغی داییسینین اونا آلدیغی دفتر- مدادین یانیندا قالمیشدی. دفتر- میدادینی اوشلاقلارا گؤسترمك ایستهییردی. اؤزو- اؤزونه - اونلارا بیر آز یاندی- قیندی وئرهجهیم. – دئییب - چوخدا یوخ! – دئییه – داوام ائتدی : گوناهدیلار. اورهكلری یانار، یالنیز بیر آزاجیق، ایینه اوجوجان.
مدرسهده هر كس بئله شئیلره راحاتلیقلا صاحاب اولا بیلمیردی. مریم بو نو بیلیردی و تئزلیك له صاحیب اولدوقلارینی اونلارا گؤسترمك ایسته ییردی.
نبی توپ گولـلهسی كیمی یئردن قالخدی و همنی دؤیمهیه باشلادی. سیله، تپیك ایدی كی باش- گؤزونه یاغیردی. همنین سسی چیخمیردی. سادهجه یاواش-یاواش آغلاییردی. كیچیك فاضیل قیشقیریب. مریمین الینین آلتیندان قاچیب, همنی قورتارماق ایسته ییردی. مریم، قوللاریندا اولان بوتون گوجویله اونو مؤحكم توتدو. سسی چیخماسین دئییه،- بیر الینی ده آغزینا قویدو. بیلیردی كی، آرادا اولسالار آتاسی اونلار ی دا دؤیهجك.
همن همیشه ایكی مسلهیه چوخ تأكید ائله ردی:- بیر - آتانیز منی دؤیهنده آرایا گیرمهیین، قورخورام سیزه بیر شئی اولا. ایكی- سسیمیزی قاپی- قونشو ائشیتمهسین. آبیریمیز اؤرتولو قالسین،- دئییهردی،- قاپی- قونشو نییه بیلسین! بیلسهلر بئشینده اوستونه قویوب دونیایا یایارلار.
مریم یوخو گؤروردومو، یوخسا، قاراباسیردی اونو، بیلمهدی. همن هر گئجه یاتمامیشدان قاباق اونا، برك- برك تاپیشیراردی:- قیزیم دیققت ائله باشینیزین اوستونده قارا بیر شئی اولماسین، قاراباسار.
گئجه یاتمامیشدان قاباق كیچیك فاضیله ناغیل دئییردیی. كیتاب اوخوما بیلمیردی. مدرسه ده «بابا نان داد.»[1]، «سارا انار دارد.»[2]، «آن مرد داس دارد»[3]، «مادر در باران آمد.»ی[4]و... تزه اوخوموشدولار. ننهسیندن ائشیتدییی بیر ناغیلی یاری دوز- یاری ترسینه فاضیله تعریف الهییردی. كیچیك فاضیل چوخ تئز یوخلادی. مریمسه ذؤوقدان یاتا بیلمیردی. میداد- دفترین فیكیری اونو راحات بوراخمیردی. «داها صاباحدان كؤثرین كؤهنه، یاری یازیلی دفترینده مشقلریمی یازمایاجاغام»،- دئییه- یاتا بیلمیردی. آمما یوخو اونو اوزویله آپاردی.
یوخودا آتاسی اونا بیر گیزلین سؤز سؤیلهمك ایستهییردی. نهدنسه چوخ مئهریبان اولموشدو. اونا یاواشجا:- سس سالما، هئچكیم بیلمهدن سنی ماشینلا بیر یئره آپارجاغام دئییردی. آمما مریم قورخوردو، آناسینا دئمك ایستهییردی، نهقدر چالیشیردی، یئنه ده سؤزونو دئیه بیلمیردی. بوغازیندان سس چیخمیردی.
آتام بیر تاكسیبارا ال ائلهدی. سوروجو یوخولو ایدی. آتامین غئیری-عادی اولماسینی باش تاپمادی: - هارایا؟- دئیه سوروشدو.
آتام مات- مات:- هارایا گئدیرسن؟- دئدی.- شوفئر تعججوبله آتامین اوزونه باخدی.
-نه یعنی!، سن هارایا گئدیرسن؟
آتام اؤزونه گلدی و بیر آدرس وئردی. شوفئر تعججوبله آتامین اوزونه باخدی. آمما دینمهدی. آیاغینی گازین اوستونه باسدی. بیردن آنلادیم ننهمگیلین ائولرینین آدرسیدیر. بؤیوك باجیم كؤثر همیشه اورادا قالاردی. آخی ننهم، نئچه ایللر ایدی خستهایدی. تعججوبوم او زامان آرتدی كی، آتام، ننهمگیله گئتمهیه تاكسییا مییندی. همیشه اورایا یئرده آددیملاركن گئدردیك. بیزه چوخ یاخین ایدی.
تورباداكینین قانی تاكسیبارین صندلینین اوستونده ده ایز بوراخدی.
نبی دؤرد آی بوندان قاباق زینداندان چیخمیشدی. مریم، آتاسینین زیندانا دوشدویونو، آناسیلا، عمهسی دانیشاركن ائشیتمیشدی.
همن:- مواد توتوبلار بیلهسیندن،- دئمیشدی،- یئددی آی یاتاجاق اورادا. اینشاللاه گئدر- گلمزه گئدر. هئچ دونمز.
عمهسی:- دیلین دیشله، آرواد،- دئمیشدی.- نه ده اوسا، او منیم قارداشیمدیر.
نبی یئددی آی سونرا ائوه دؤندو. مریم اوچون اوزون سوردو گلمهسی. همن، نبینین دؤنمهسیندن ناراحات ایدی. اؤز- اؤزونه:- نهتئز باشا گلدی بو یئددی آی،- دئییردی. نبی دؤندویو گوندن یئنه ده سؤزلر، داوالار باشلانمیشدی. زینداندان قایداندان سونرا تزه باهانالار تاپمیشدی، تزه سؤزلر اؤیرهنمیشدی. همن تعججوب ائلهییردی. اونو آنلایا بیلمیردی. اونلارین یاشادیغی اؤلكهده بوشانماق دب دئییلدی. همنی هئچكس نبیدن آیریلاندان سونرا ساخلامازدی، قارداشی بئله. اورادا قادینلار، بو موصییبتدن قورتولماق اوچون اؤزلرینی یاندیریب، اودا چكردیلر. بو بیر دبه دونوشموشدو. همن یا گرك اؤزونو او بیری قادینلار كیمی اودا چكیب، اؤلومو سئچردی یا اوتوروب اوت سوز بیر عومور یاناردی.
او بونلاری بیلیردی و آبریسینا قیسینیردی. نبینین اونون اوستونه آد قویوب، سونرا راحاتچلیقلا اونو اؤلدورمهسیندن ده قورخوردو. بو دا ایكیجی دب ایدی بو اؤلكهده. او بو اؤلكهده اوشاقلارینین صاحابسیز قالماسیندان دا قورخوردو.
نبی، زینداندان چیخاندان سونرا همنین قارداشی عبدوللایا ایلیشمیشدی. همنه:- نییه گلدی قارداشین بو ائوه؟ ،- دئییردی،- نییه گئتدی؟ سنه نه ائلهدی قارداشین؟ نه دن الیندن توتدو؟ نییه مریم ایله دانیشیر؟ نییه مریمی قوجاغینا آلیر؟ و....
او آخشام نبی ائوه دونمهمیشدن قاباق دایییسی عبدوللا یئنه همنه باش چكمهیه گلمیشدی. مریمه ده بیر دفتر و بیر میداد آلمیشدی. مریم سئوینجیندن بولودلاردا اوچوردو.
عبدوللا ائولی دئییلدی، یاشی بیر آز كئچدییندن دالیجا دئدی-قودو دا وار ایدی.
تاكسی ساخلادی. آتام بولانا - بولانا یئره دوشدو. سونرا ننهم گیلین كؤچهلرینه گیردی. قاپلارینین دالیندا بیر آز دایاندی. قان داملالاری تاكسیباردان ننهم گیلین قاپیلارینا كیمی چكیلمیشدی. هر كس یاتمیشدی. آتام قاپی دالیندا بیر-بیرینین اوستونه ییغیلان، اودون و داش قالاغینین اوستونده اوتوردو. بئینینین ایچی قاریشمیشدی، هئچ تصمیم توتا بیلمیردی، الینده كی توربا اونو گیجهلتمیشدی.
یوخو گؤروردومو، یوخسا قاراباسیردی مریمی، بیلمیردی. بیردن-بیره چینینین اوستونده بیر شئی اولدوغونو حیسس ائتمهیه باشلادی. قورخدو. گؤزلرینی آچدیغیندا نبی یانیندا اهیلهشمیشدی. نبی، مریمین گؤزلرینین آچیلدیغینی آنلادییی زامان الینی اونون آغزینین اوستونه قویدو. یئردن دورماغینا بیر الی ایله كومك ائلهدی، و یولا دوشدو. مریم نهدنسه آتاسینین بیر الینده بیر شئی گیزلتدییینی حیسس ائلهدی،« نهدیر بو؟»، « آتامین منیمله نه ایشی وار؟»، « منه بیر شئی می آلیب، فاضیل بیلمهسین دئییه بورادا وئرهجكدیر؟ آمما نه دن گئجه یاریسی، بو ایشی گوندوز ده ائلهیه بیلردی!»، « یئنه آنامین بارهسینده منی سورغویا چكهجكدیمی؟»، «آهان، بیلدیم! عبدوللاه داییم دان سوروشاجاق!، بو گون یئنه بورا گلیبدیر دئییه سوال وئرهجك؟ سنه بیر شئی ائله دی می دئییهجك؟ همیشه سوروشدوغو سواللار! » و...
نبی، مریمی زئرزمییه آپاردی. نهدنسه چوخ مئهریبان اولموشدو. آمما مریم بونو حیسس ائده بیلمهییردی، چونكی قورخو دولو بیر ووجودا دؤنموشدو. آتاسی ایله اونلارین آراسیندا همیشه بیر مسافه واریدی. مریم آتاسینین باخیشلاریندان، اوزون بویوندان، هئیكلی بدنیندن، یئكه و آغیر اللریندن همیشه قورخاردی. جهد ائلهدی اؤزونه اورهك وئرسین:- نییه قورخورام،- دئدی،- هر نه اولسا دا نیهایت ده آتامدیر.
نبی، مریمین آغ بالیشینی دا اؤزویله گتیرمیشدی. بالیشی زئرزمیده یئره قویدو و اونا: - اوتور اوستونده دئدی. مریم اؤز- اؤزونه: «آنام بیر بیلسه بالیشی زئرزمینین توز-تورپاغینا سورتموسن، حتمن ائوده بیر داوا دوشر،- دئدی».
آتام آیاغا قالخدی، توربانی هله ده الینده كیپ-كیپ توتموشدو. قورخوردو بیر آز بارماقلارینی بیر-بیریندن آچا و توربا آیاغ توتوب الیندن قاچا. یئنه یولا دوشدو. داها اونون هارایا گئتدییینی, بیلمیردیم. كؤچهنین بوروغونو چؤندو. اوزاقدان چوخلو ایشیق گؤرونوردو. آتام ایشیقلارا ساری یورومهیه باشلادی.
نبی:- قیزیم سندن بیر سؤز سوروشاجاغام،- دئدی،- دوغرو جواب وئر. یاخشی ؟
مریم، باشییلا اونا یاخشی، دئدی.
- دایین بورا گلمیشدی دئییلمی؟
اونا بیر جاواب وئره بیلمهدی. آناسی برك-برك تاپیشیرمیشدی، آتان بیلمهسین. نه دئییهجهیینه قالمیشدیی. آتاسی ایكینجی سورونو سوروشدو:
- دایین بورایا گلنده سنی قوجاغینا آلارمی؟
- بلی، -دئدی.
- سنین اوز-گؤزوندن اؤپرمی؟
- بلی،- دئدی، و یئردن گؤیه اوچدو. نبینین تپییی دوز قارنیندان دهیمیشدی. بیر آز او طرفلیك یئره دوشدویونده، نبی باشینین اوستونده دورموشدو.
آتامین گؤزلری قان چاناغی كیمی اولموشدو، قیپ-قیرمیزی.
آیاقلاری یئرده سورونوردو. ایشیقلارا چوخ یاخینلاشمیشدی. اورا بیر ائوه بنزهییردی. بیری او ائوین قاپیسی قاباغیندا دورموشدو. آتام بیر آز اورایا قالان دایاندی. ائله بیل تصمیم توتا بیلمیردی كی، یاخینا گئتسین یوخسا قاییتسین.
نبی مریمین توكلریندن یاپیشدی، اونو یئردن قووزادی:- او سنه تجاوز ائتدیمی؟- دئییه، سوروشدو.
مریم حدقهدن چیخمیش گؤزلرله نبینین اوزونه باخیدی. «تجاوز نهدیر؟» بیلمیردی.«آتام مندن نه ایستهییر؟» دئییه اؤزوندن سوروشودو. دوشوندو : «درسلریمیزده تجاوز دئیه بیر شئی اوخودوقمو؟، «خانیم موعللیم بو بارهده بیز ایله دانیشیبمی؟»، «یوخ دانیشماییب، نه دئیم آتاما، بلیمی، یوخمو؟»
مریم یئنه اؤزونو هاوایلا یئر آراسیندا تاپدیغیندا سسی چیخماسین دئیه یئره دوشنده دوداقلارینی مؤحكم دیشلرینین آراسیندا سیخدی. سونرا آنی بیر قیغیلجیم بئینینین ایچینده چیراق كیمی یانمایا باشلادی؟« بلی دئسهم، بلكه منی وورمازدا، چوخ آغرییر» یاواشجا آغزینین قانینی یئره توپوردو و زاریلادی. نبی بیر یئكه زوپا الینده اونا یاناشدی. مریمین قیچی بتر آغریردی. قیچینی هئچ ترپهده بیلمیردی. باشینی آستاجا قووزادی. اوز-گؤزو داغیلمیشدی. نبینین اوزونه باخدی. نبییه سسسیزجه یالواریردی ائله بیل.
نبی باشی اوستونده اوتوردو. غیظله مریمه :- ائتدیمی؟ ائتمهدیمی؟ دئیه،- سوروشدو.
مریم آغلایا- آغلایا كیچیك الی ایله آغزینین قانینی سیلدی. بیر درین آه چكیب:- ائتدی،- دئدی.
آتام بیر موددت اورادا دایاناندان سونرا ایشیقلارا طرف یویوردو. توربانین قانی هله یئرده ایز بوراخیردی. قاپی قاباغیندا دوران آدام بیر عسگر ایدی. چینینین اوستونده بیر توفنگ وار ایدی. آتامی گؤروب:- دور! سن! كیمسن؟ نه ایستهییرسن؟- دئدی.
آتام هئچ دئمهدی. یالنیز الینده كی توربانی عسگرین گؤزو قاباغینا توتدو. توربانین اوستونده كی قان و قانین یئره توكولن داملالاری اونو سارسیتدی. عسگر ایختییارسیز بیر حالدا قیشقیردی: سركار اوستووار!، سركار اوستووار!
هر كس ایچریدن ائشییه چیخدی. هامیسی تومموشدولار و ایستر- ایستهمز فقط توربایا باخیردیلار. نبی اونلارین گؤزو قاباغیندا ایچرییه یورویوب. توربانی اوتاقداكی ماسانین اوستونه قویدو. ماسانین اوستونو قان گؤتوردو. نبی ماسانین یانیندا یئره اوتوردو.
نبی مریمین ساچلاریندان یاپیشدی و بو دفعه چیغیردی:- نه دئدین؟ او حریف سنه تجاوز ائتدی، دئییلمی؟- مریم جاواب وئرمه فورصتی تاپمادی.
نبی مریمی یئرین اوستونده سوروتدویه- سوروتدویه بالیشا طرف چكدی. مریمین باشینی بالیشین اوستونه قویدو . اؤزوده مریمین اوستونده اوتوردو. مریم چابالامایا باشلادی. داها چوخ قورخموشدو. چیغیرماق ایستهدی، آمما نبی او یئكه الیله آغزینی توتدو. او بیریسی الی ایله بیچاغی سؤرعتله مریمین بوغازینا چكدی. قان هر یئره فیشقیردی. بیرده چكدی و...
همن سسه دیسكیندی و دیك یئرینین ایچینده اوتوردو. اطرافا باخدی. مریمین یئرینی بوش گؤرنجه. فنر كیمی یئردن قالخیب او بیریسی اوتاغا نبینین یئرینه باخدی. نبی ده یوخ ایدی. اؤرهیی آغرینین ایچینده چالینمایا باشلادی. اطرافا یئنه باخدیغیندا، زئرزمینین یانیق چیراغی نظرینی جلب ائتدی. یئیین-یئیین پیللهلره طرف قاچدی. بیر پیللهنی گؤرمهیینجه باشی اوستونده یئره چؤكدو. زئرزمینین قاپیسی قاباغیندا بیر آز دایاندی. یاواش-یاواش ایچری گیردی. مریم نبینین قاباغیندا اوزانمیشدی. آشپازخانانین آغ دسته یئكه بیچاغی قانلی اولاراق یئرده ایدی. مریمی دیقتتله گؤرموردو. نبینین نه ائلهدییینی ده. نبینین دالی اونا ایدی. همن بوغازیندا ییغیشان سویو زورلا اودغوندو و سسی چیخار- چیخماز نبینی سسلهدی. نبی یاواشجا دؤندو. همن, نبینین نه ایشه مشغول اولدوغونو گؤردو. نبی ایكی اللی مریمین یارییا كیمی كسیلمیش بوغازینی بیر- بیریندن آییریردی. همن قیشقیردی. قیشقیردی، آغلادی. آغلادی و یوخاریا كیچیك فاضیله ساری قاچدی. سونرا....
عسگر ، سركار اوستووارین امریایله توربانین آغزینی آچدی و گؤردویو منظرهدن چیلغینجا چیغیردی. اوتاقدا كی، هركسین آغزی آچیق قالمیشدی. رنگی سارالمیشدی. سانكی بیر شوك ایچینه گیرمیشدیلر. هر كس سوسموشدو. مریمین توكلری قاندان بیر-بیرینه گیرمیشدی. چؤلدن دریانین سسی گلیردی. دریا هو دئیه باغیریردی سانكی.
نبی اؤز-اؤزونه صبر ائله همن سنینكین ده سنه وئرهجهیم،- دئییردی. لاپ اؤز باشینا اولموسان. من سنی ایللردیر چؤله چیخماقدان منع ائلهمیشم. سن گئجه یاریسی چؤله چیخیرسان. بیر قیچییین سیندیراندا اوندا بیلرسن كی، نبینین هئچ كسله ظارافاتی یوخدور. بو فیكیرلرله یئردن قالخدی و قاپییا طرف آددیملادی. قاپیدا دوران عسگر گؤزلرینین یاشینی سیله-سیله سیلاحینی اونا ساری توتدو:- اللرینیزی قالدیرین، سیزی توتمایا فرمانیمیز وار- دئدی.
نبی تعججوب ائلهدی:- نییه،- دئییب، سوروشدو؟
اوستووار اونا نیفرتله باخدی و جورملرینی سایدی.
نبی:- سیز منه هئچ بیر شئی ائلهیه بیلمزسینیز.- دئدی.- من اوز حاق و حوقوقومو ازبرم، من ناموسومو، شرفیمی قوروموشام. بو آللاهین بویوروغودور! یاخشی ایش گؤرون، یاخشیلیغا چاغیرین. من ده جیهاد ائلهمیشم. اگر منه بیر شئی ائلهسهنیز، من آللاهین بویوردوغو یولدا شهید ساییلاجاغام. بونو ایستهییرسینیز سه منی توتون.
اوستووار آغلادی. ماسانین اوستوندهكی باشین حدقهدن چیخمیش گؤزلرینین بیرینده ایكی داملا یاش دونموشدو.