+0 به یه ن / بپسند
یازار : سوسن نواده رضی
مجتبی نخجوانی 1338 گونش ایلینده تبریز شهرینده آنادان اولدو. آتاسی، رحمتلیك "میر مصور ارژنگی" و "علی محمد حیدریان"-ین شاگیردلریندن اولان اوستاد مرتضی رسام نخجوانی، ایرانین تانینمیش و سبك صاحبی اولان صنعتكار رسام‌لاریندان‌دیر.
مجتبی نخجوانی ایلك و اورتا اوخولو 1357-ده
بیتیرینجه تبریز بیلی‌یوردونون فنی فاكولته‌سینده –مكانیك مهندیس‌لییی دالیندا-
قبول اولوب، تحصیلاتینی داوام ائتدی.
1361 ایلینده نخجوانی آدلی هنری گالری‌سینی قوردو و او زاماندان بری رسسام‌لیغا ماراقلی اولان‌لارا بو صنعتی اؤیره‌تمه‌یه مشغول‌دور.
1364-ده مهندیس‌لیك دالیندا لیسانسینیی آلدی و 1365-ده رویا خانیم‌لا ائوله‌ندی. بو ائولی‌لیین مئیوه‌سی "پریا" و "پارلا" آدلی ایكی قیزی اولموشدور.
یئتمیشلی و سكسه‌نلی ایل‌لرینده معمارلیق فاكولته‌سینده و رسساملیق هنرستانیندا رسساملیق و تاساریمچیلیق (طراحی) صنعت‌لرینی اؤیره‌تمك‌له مشغول اولور. سونرا دا 1379-نجو ایلده تبریزده قیزلارا اؤزل ایلك غیردؤلتی رسساملیق هنرستانینی قوردو.
او بئله دوشونور كی، هر هنر اؤیره‌نجی‌سی ایلك اؤنجه فورمو قاورامالی، سونرا اونو اولدوغو كیمی تاساریم‌لایریندا (طرح‌لرینده) یانسیتمالی‌دیر. بو آشامادان سونرا او، دئفورمه ائتمه‌یی سیناماغا اؤزگوردور. نهایتده ایسه، اؤز هنری اثرینی اؤزونه اؤزل اولان دیل ایله سرگی‌له‌یه بیلر. بو دیل، اكسپرسیونیسم، آبستره، كوبیسم، سوررئالیسم، فوویسم یا هر هانكی بیر باشقا سبكده اولا بیلر، یا دا ایلكه اولاراق دوغایا باغلی قالا بیلر.
بو رسسامین اثرلرینده، آلتمیشلی ایللرده، فیرچانین نارین و حئسابلانمیش ضربه‌لری و دوغایا یاخین رنگلر یئرینی یئتمیشلی ایللرده سرت و اؤزگورجه ضربه‌لرله و ایچ دویغولارینی یانسیدان رنگلرله ده‌ییشمیش‌دیر.
1379 ایلینده «اوستاد مرتضی نخجوانی‌نین یاشامی و رسساملیق اثرلری» آدلی كیتاب یازیب، یایین‌لامیشدیر.
ایندی‌لیك رسساملیق ائتمك و رسساملیغی بو صنعته ماراقلانان یئته‌نكلی
اؤیرنجی‌لره اؤیر‌تمك، ها بئله تاساریمچیلیق(طراح‌لیق) و رسساملیغی هنر اوخول‌لاریندا
و هنر فاكولته‌لرینده آكادئمیك اولاراق اویرتمك بو اوستادین ان چوخ واختینی
دولدورماقدادیر.
اوستاد مجتبی نخجوانی‌نین انفرادی سرگی‌لری:
تبریزده یاخلاشیق اییرمی سرگی؛ مانی گالری‌سینده (نگارخانه‌سینده)، یاسمی گالری‌سینده، شخصی گالری‌سینده و س...
تهران‌دا؛ كمال‌الملك گالری‌سینده، برگ گالری‌سینده، والی گالری‌سینده، نقش جهان گالری‌سینده.
آنكارا و استانبول شهرلرینده.
توپلو سرگی‌لر:
یاخلاشیق اوتوز سرگی تبریز شهرینده؛ مانی گالری‌سینده (نگارخانه‌سینده)، یاسمی گالری‌سینده، هنر ائوینده و س...
تهران‌دا؛ معاصر هنرلر موزه‌سینده، نقش جهان گالری‌سینده و س...
مشهد، باكی و استانبول شهرلرینده.
اوستادین اثرلریندن بیر اورنك
